Տաղանդաշատ դաշնակահար Շողեր Հովեյանը, ում՝ հայ եւ արեւմտաեվրոպական կոմպոզիտորների ստեղծագործությունների մեկնաբանությունները վաղուց են հիացրել եվրոպացի եւ հայաստանցի ունկնդրին, օգոստոսի 8-ին էլ Գերմանիայի Հաննովեր քաղաքում կներկայացնի գերմանացի ժամանակակից կոմպոզիտոր Յենս Վիլտֆանգի ինքնատիպ ստեղծագործությունները: Դրանք կկատարվեն առաջին անգամ՝ «Սառցե անձրեւ» ձայնասկավառակի համերգ-շնորհանդեսի ժամանակ:
Շողեր Հովեյանը նշում է, որ նոր երաժշտություն ներկայացնելը ինչ-որ առումով ռիսկային է, որովհետեւ մտածում ես՝ արդյոք ճի՞շտ կներկայացնեց եւ արդյոք մարդիկ ճիշտ կընկալեն, հատկապես, որ ներկայացվելիք երաժշտությունը ընդունված ստանդարտների մեջ չի տեղավորվում:
Առաջին մասնագիտությամբ Յենս Վիլտֆանգը բժիշկ-հոգեբան է: Համերգի ընթացքում Շողեր Հովեյանի յուրաքանչյուր կատարում յուրովի կմեկնաբանի ճանաչված դերասանուհի Նոյեմի Բեսեդսը, որը դասական երաժշտության մեծ սիրահար է: Համերգին որոշ գործեր կկատարի նաեւ հայ սաքսոֆոնահար Հայրապետ Առաքելյանը:
Կարդացեք նաև
Համավարակի պատճառով դահլիճում ներկա կլինի առավելագույնը երեսուն ունկնդիր, իսկ հայաստանյան հեռուստաալիքներից բացառիկության սկզբունքով համերգի հեռարձակման հնարավորություն է տրվել TV5 հեռուստաընկերությանը:
Շողեր Հովեյանը ալտահար Վաչե Հովեյանի քույրն է, բանաստեղծ Հովիկ Հովեյանի եւ կոմպոզիտոր, Կոմիտասի անվան կոնսերվատորիայի պրոֆեսոր Վարդ Մանուկյանի դուստրը:
Գոհար ՀԱԿՈԲՅԱՆ
Լուսանկարները Շողեր Հովեյանի ֆեյսբուքյան էջից:
