Կառավարության շենքի առջեւ հացադուլ անողները դարձան 6-ը: Այսօր կառավարության շենքի առջեւ անժամկետ հացադուլ է հայտարարել նաեւ «Հայրենիք» կուսակցության անդամ Տիգրան Սուքիասյանը:
Aravot.am–ի հետ զրույցում նա ասաց, որ «Հայրենիք» կուսակցությունն իր այդ քայլը չի ողջունել, քանի որ դա ծայրահեղ քայլ է եւ վտանգավոր է առողջության համար, եւ դա իր անձնական որոշումն է: Տիգրան Սուքիասյանի պահանջը նույնն է՝ վարչապետ Նիկոլ Փաշինյանի հրաժարականը:
«Նիկոլ Փաշինյանը, եթե մեղմ ձեւակերպելու լինեմ, պետք է ներողություն խնդրի եւ հրաժարական տա»,-ասաց Տիգրան Սուքիասյանը՝ տեղեկացնելով, որ արցախյան այս պատերազմին ինքը «Հայրենիք» ջոկատի կազմում, որպես կամավորական, մասնակցել է Շուշիի եւ այլ բնակավայերի պաշտպանությանը եւ իրենց ջոկատով վերադարձել են Երեւան նոյեմբերի 8-ին: Իսկ երեկ ինքը հրավիրվել է ՀՔԾ այն պատճառաբանությամբ, որ խախտել է ռազմական դրության պայմաններում հավաքների մասնակցելու արգելքը:
Հայտնենք նաեւ, որ Մայր աթոռի տեղեկատվական համակարգի ղեկավար Տեր Վահրամ քահանա Մելիքյանը այսօր այցելել է Նիկոլ Փաշինյանի հրաժարականը պահանջող հացադուլավորներին և նրանց փոխանցել Ամենայն Հայոց Կաթողիկոսի օրհնությունը։
Կարդացեք նաև
Հիշեցնենք, որ հացադուլ են անում ՀՅԴ անդամ, «Երկիր մեդիա» ՀԸ քաղաքական եւ լրատվության բաժնի ղեկավար Գեղամ Մանուկյանը, ՀՅԴ անդամ Գարիկ Ավետիսյանը, ՍԴ նախկին անդամ Կիմ Բալայանը, 2008 թվականին զոհված Անդրանիկ Կիրակոսյանի մայրը՝ Անահիտ Կիրակոսյանը եւ 77-ամյա թոշակառու Ֆելիքս Պետրոսյանը, որի թոռնիկն է զոհվել արցախյան պատերազմում:
Աշոտ ՀԱԿՈԲՅԱՆ
