Ինչպես տեղեկացրել ենք, այսօր կյանքի 77-րդ տարում մահացել է ՀՀ ժողովրդական արտիստ, պրոֆեսոր, ՀՀ արվեստի վաստակավոր գործիչ, բեմադրիչ Վահե Սուրենի Շահվերդյանը: Շահվերդյանը ծնվել է 1945 թվականի օգոստոսի 9-ին, Կիրովականում:
1971 թվականին ավարտելով Երեւանի գեղարվեստաթատերական ինստիտուտը, գործուղվել է հայրենի քաղաքի Հովհ. Աբելյանի անվան պետական դրամատիկական թատրոն: Երկու տարի անց շնորհալի բեմադրիչի հայտ ներկայացնող երիտասարդ ռեժիսորին վստահվում է թատրոնի գեղարվեստական ղեկավարումը:
Վանաձորի Հովհաննես Աբելյանի անվան պետական դրամատիկական թատրոնի տնօրեն Լուսինե Սահակյանը ցավով է փաստում, որ տաղանդավոր բեմադրիչի բացակայությունը մեծ կորուստ է ոչ միայն նրա հարազատների, այլեւ հայ թատերարվեստի, ուսանողների, երկրպագուների եւ, հատկապես՝ Վանաձորի դրամատիկական թատրոնի համար. «Քայլող լեգենդ էր… Մենք հենասյուն ենք կորցրել… Հայ թատերարվեստի կորուստն իրապես անչափելի է…»:
Վահե Շահվերդյանը 85 բեմադրությունների հեղինակ է, որոնցից շատերը համարվեցին ազգային թատրոնի նվաճումներից: Իսկ լավագույն ներկայացումը համարվում է Ա. Չեխովի «Երեք քույր» ներկայացումը: Ինքնատիպ աշխատանք է համարվում նաեւ Գ. Լորկայի «Բեռնարդա Ալբայի աղջիկները» դրաման:
Կարդացեք նաև
Վահե Շահվերդյանը կառավարության կողմից պարգեւատրվել է Մովսես Խորենացու եւ «Հայրենիքին մատուցած ծառայությունների համար» 2-րդ աստիճանի մեդալներով, արժանավորվել է ՀՀ ԿԳ եւ Մշակույթի նախարարությունների, նաեւ՝ ԵՊՀ Ոսկե մեդալներով, ՀԹԳՄ «Արտավազդ» եւ Համահայկական «Վահագն» մրցանակների դափնեկիր էր:
Տաթեւիկ ՂԱԶԱՐՅԱՆ
Հետևից ուրիշ բաներ էիր խոսում, հմի ինչ է խոսում: