Վերջին 20 տարում կառուցվող բոլոր շենքերը համապատասխանում են նոր ստանդարտներին, ապահովվում է 9 բալ սեյսմակայունությունը, նոր կառուցապատման սկզբունքներում կա ե՛ւ նորմատիվային բազա, ե՛ւ վարչարարություն, որը հետեւում է, որպեսզի կառուցապատման ողջ գործընթացն անցնի ստանդարտներին համապատասխան: Այս մասին այսօր «Մանթաշյանց» ակումբի մամուլի սրահում հայտարարեց «Էլիտ գրուպ» ընկերության հիմնադիր Դավիթ Մկոյանը՝ հույս հայտնելով, որ բոլոր կառուցապատողները պահպանում են կառուցապատման նոր ստանդարտները:
Նրա խոսքով՝ Հայաստանի բազմաբնակարան շենքերի մոտ 90%-ը կառուցվել է խորհրդային տարիներին: Այդ շենքերի մեծ մասն արդեն հիսուն տարվա է. դրանք կրել են 1988 թվականի երկրաշարժի ազդեցությունը, ենթարկվել բնականոն մաշվածության: Բացի այդ՝ շենքերը նախագծվել և կառուցվել են 7-8 բալային կայունությամբ, ինչի հետևանքով առկա է բարելավման կարիք ունեցող, «ծերացած» բնակֆոնդի մեծ հատված: «Էլ չեմ խոսում այն մասին, որ այն շենքերը, որոնք պետք է համապատասխանեին 7-8 բալային կայունությանը, ոչ բոլորն էին համապատասխանում: Ցավոք այդտեղ ե՛ւ շինարարի խնդիրը կար, ե՛ւ մարդկային գործոնի խնդիրը: Մենք գիտենք, որ շատ հաճախ մարդիկ կամայական վերաբերմունք են ցուցաբերում շենքերի նկատմամբ: Մենք հիմա էլ տեսնում ենք, թե բնակիչների կողմից ինչպիսի ոտնձգությունների են ենթարկվում բազմաբնակարան շենքերը, լավ է, որ ներկայումս կառուցապատողների կողմից որոշակի վերահսկողություն կա նորակառույց շենքերի նկատմամբ. եւ շենքերի կրող պատերի վրա կարողանում են կանխել նմանատիպ դեպքերը: Իրականում դա շատ մեծ խնդիր է»,- ասաց Մկոյանը:
«Ալտեք» ընկերության հիմնադիր Ալիկ Բասենցյանն ընդգծեց, որ արդի շինարարությունում շատ կարևոր է հաշվի առնել երկրաշարժերի գործոնը որպես սպառնալիք և կառուցապատումն իրականացնելիս պահպանել նորմատիվները և աշխարհի տնդենցները: «Մենք ոչ թե պետք է խուսափենք բարձրահարկ շինարարություն իրականացնելիս, այլ հասկանանք՝ որպես պետություն ինչ նորմատիվներ սահմանենք և վերահսկողություն իրականացնենք, որպեսզի ունենանք հարմարավետ, զարգացող քաղաք՝ ժամանակակից ճարտարապետությամբ և ապահովվենք առավելագույն անվտանգությունը»,- նշեց Բասենցյանը:
Բանախոսները տեղեկացրեցին, որ ներկայումս շինարարության մեջ ամենատարբեր ժամանակակից մեթոդներ կան, այդ թվում նաև սեյսմիկ մեկուսիչնեը, որոնց կիրառման շնորհիվ կարելի է ապահովել շենքի սեյսմակայունությունը:
Կարդացեք նաև
Լուսինե ՄԱՐԳԱՐՅԱՆ
