Մեր կանխատեսման համաձայն՝ 2023-ին ՀՆԱ-ի աճը կկազմի 5,8 տոկոս: Այս մասին այսօր մամուլի ասուլիսին ասաց Կենտրոնական բանկի նախագահ Մարտին Գալստյանը՝ հավելելով, որ մեծ աճ ակնկալում են ծառայությունների և շինարարությունների ոլորտում:
«Շինարարության ոլորտում նաեւ որոշակի մեկ պրոյեկտով պայմանավորված շինարարական աշխատանքների որոշակի աճ ենք ակնկալում»:
Անդրադառնալով Ամուլսարի հանքի շահագործմանը՝ ԿԲ նախագահը ասաց, որ շահագործման դեպքում միգուցե արտարժույթի ներհոսք լինի: Նա նշեց, որ ամբողջական պատկեր ստանալու տեսանկյունից պետք է համադրել մեր վճարային հաշվեկշռի բոլոր կոմպոնենտները:
Ի պատասխան այն հարցին, թե արդյո՞ք ռուս-ուկրաինական պատերազմով պայմանավորված արտարժույթի ներհոսք կա տնտեսություն, Գալստյանը պատասխանեց. «Մենք ելնում ենք այն իրողությունից, որ հայկական դրամի փոխարժեքն ազատ լողացող է, ու ԿԲ-ն շուկայում միջամտությունը սահմանափակում է անկանոն և պրոբլեմատիկ իրավիճակները որոշակիորեն հարթելու միջոցով: Անցած տարվա ընթացքում մենք հանդիպել ենք իրավիճակների, որ ԿԲ-ն միջամտել է շուկայում տեղի ունեցող իրադարձություններին՝ ձեռք բերելով արտարժույթ, որի արդյունքում նախորդ տարվա ընթացքում մեր առքը ֆինանսական շուկայից կազմել է 900 միլիոն դոլարից ավելի գումար»:
Կարդացեք նաև
Ինչպե՞ս է ռելոկանտների գործոնն անդրադառնում Հայաստանի տնտեսության վրա՝ հարցին ԿԲ նախագահը նախ նախընտրեց ոչ տնտեսագիտական պատասխան տալ: «էական դրական փոփոխություն կա Հայաստանում այդ առումով, մարդկանց ներկայությունը փոխում է ճաշակ, փոխում է մշակույթ, փոխում է հարաբերություններ: Ես կարծում եմ, որ դա շատ դրական երևույթ է : Ինչ վերաբերվում է տնտեսական զարգացումներին , ապա մենք տեսնում ենք, որ արտաքին պահանջը, որ ստեղծվում է այցելուների կողմից որոշակիորեն բարձրացրել է մեր գները ու Կենտրոնական բանկի համար առաջացրել է որոշակի բարդություններ»,– ասաց Գալստյանը։
Լուսինե ՄԱՐԳԱՐՅԱՆ
