20-րդ դարի մեծագույն կոմպոզիտոր Արամ Խաչատրյանի համար տարին հոբելյանական է, նշվում է նրա ծննդյան 120-ամյակը, եւ այդ առիթով բազմաթիվ միջոցառումներ են մեկնարկել Հայաստանում ու աշխարհում: Դիվանագիտության մեջ հնաբնակ, արտակարգ դեսպանորդ եւ լիազոր նախարար Ռուբեն Շաքարյանը, որ հայտնի է արվեստագետների և, մասնավորապես նկարիչների հետ ունեցած սերտ կապերով, այս անգամ իր հավաքածուից մի դիմանկար է նվիրել «Արամ Խաչատրյան» համերգասրահին՝ կոմպոզիտորի հոբելյանի առիթով: Նվերն ընդունել է Հայաստանի ազգային ֆիլհարմոնիկ նվագախմբի եւ «Արամ Խաչատրյան» համերգասրահի տնօրեն Նորայր Նազարյանը:
Aravot.am-ի հետ զրույցում Ռուբեն Շաքարյանն ասաց, որ Արամ Խաչատրյանին համարում է թիվ մեկ կոմպոզիտորը, որի մասին շատ է լսել իր ձեւակերպմամբ՝ թիվ մեկ գիտնականից՝ Վիկտոր Համբարձումյանից, որի երկարամյա օգնականն է եղել արտաքին կապերի գծով: «Արամ Խաչատրյանի դիմանկարը գրությամբ հանձնեցի Նորայր Նազարյանին: Այս պահին համերգասրահում վերանորոգում է, ժամանակավորապես նկարը մի տեղ կկախեն, մինչեւ այն գտնի իր ճիշտ տեղը»,-հավելեց դիվանագետը։
Աշխատանքի հեղինակը Հենրի Էլիբեկյանն է, նկարը նա Շաքարյանին նվիրել է Մոսկվայում եւս 3 աշխատանքների հետ: «Արամ Խաչատրյանի դիմանկարը 2013թ ինձ նվիրել է Հենրին: Մի դիմանկար էլ նվիրել եմ «Արամ Խաչատրյան» թանգարանին, հանձնել եմ տնօրեն Արմինե Գրիգորյանին՝ Արամ Իլյիչի ծննդյան 115-ամյակի առիթով: Այն այժմ կախված է թանգարանի սրահում՝ եռալեզու մակագրությամբ: Կոմիտասի դիմանկարը նվիրել եմ Կոմիտասի անվան պետական կոնսերվատորիային: Կոմիտասի մի նկար էլ նվիրել եմ Կոմիտաս թանգարան-ինստիտուտին: Նկարները նվիրում եմ պետությանը, որ գույքագրվեն ու պահպանվեն: Դրանք բացառիկ գործեր են: Ինչպես արդեն նշեցի, բոլորի հեղինակն էլ Հենրի Էլիբեկյանն է»,-ասաց Ռուբեն Շաքարյանը:
Նա նաեւ հիշեց, որ 2004-ին, երբ մասնակցում էր Բուենոս Այրեսում հայկական խաչքարի բացմանը, այսօրվա Հռոմի պապը, որն այն ժամանակ դեռեւս կարդինալ Բերգոլիո էր, ինչ հիացմունքով էր խոսում Արամ Խաչատրյանի մասին: Ինչ վերաբերվում է հայկական խաչքարին, այն Շաքարյանն էր տարել Բուենոս Այրես, հեղինակն էլ Գրիգոր Բաղումյանն էր:
Կարդացեք նաև
Գոհար ՀԱԿՈԲՅԱՆ
Լուսանկարների հեղինակային իրավունքը Հայաստանի ազգային ֆիլհարմոնիկ նվագախմբինն է:
