2026 թվականի մայիսի 11-ին Լոռու մարզի առաջին ատյանի ընդհանուր իրավասության դատարանը մերժել է Սամվել Կարապետյանի հայցն ընդդեմ Ազատ Արշակյանի՝ զրպարտություն հանդիսացող փաստացի տվյալները հրապարակային հերքելու, հրապարակայնորեն ներողություն խնդրելու և 6 միլիոն դրամ փոխհատուցում վճարելու պահանջների մասին, արձանագրելով, որ նույնիսկ ամենասուր քննադատությունը չի կարող ինքնաբերաբար համարվել զրպարտություն, եթե այն ներկայացվում է որպես կարծիք և վերաբերում է հանրային հետաքրքրություն ունեցող հարցերի։
Կայացված վճռով Դատարանը կարևորել է խոսքի ազատության սկզբունքը՝ ընդգծելով, որ հանրային դաշտում գործող անձանց վերաբերյալ գնահատականները պետք է դիտարկվեն առավել լայն հանդուրժողականության շրջանակում։
Ազատ Արշակյանի շահերը Դատարանում ներկայացրել են ՀՔԱ Վանաձորի գրասենյակի ներկայացուցիչներ՝ Անի Չատինյանը և Սամսոն Գալստյանը։
Գործի հիմքում Գերագույն խորհրդի նախկին պատգամավոր Ազատ Արշակյանի՝ 12.07.2025թ. լրագրող Նարեկ Կիրակոսյանի, ինչպես նաև 22.07.2025թ. Առաջին լրատվականի «Բաց Հարթակ» հաղորդմանը տված հարցազրույցում հնչեցրած արտահայտություններն էին, որոնցում նա քննադատական ձևակերպումներով անդրադարձել էր Սամվել Կարապետյանի գործունեությանը։ Հայցվոր կողմը պնդել էր, որ այդ հայտարարությունները պարունակում են իրականությանը չհամապատասխանող և զրպարտչական բնույթի տեղեկություններ, որոնք արատավորում են Սամվել Կարապետյանի պատիվը, արժանապատվությունն ու գործարար համբավը։ Մասնավորապես, ըստ հայցի, Ազատ Արշակյանը հրապարակայնորեն ներկայացրել էր, թե Սամվել Կարապետյանը գործում է Հայաստանի Հանրապետության դեմ, պաշտպանում է այլ երկրի շահերը, հարկեր չի վճարում, «կողոպտել և տարել է կրկեսը» և կատարել էր այլ նմանատիպ հայտարարություններ, որոնք Սամվել Կարապետյանը գնահատել էր որպես փաստացի տվյալներ, ոչ թե կարծիք։
Կարդացեք նաև
Հայցադիմումով դատարանից պահանջվում էր պարտավորեցնել Ազատ Արշակյանին հրապարակայնորեն հերքել այդ տեղեկությունները, հրապարակային ներողություն խնդրել և վճարել 6 միլիոն դրամ փոխհատուցում՝ զրպարտության հետևանքով պատճառված վնասի համար։
Գործի քննության արդյունքում Դատարանը, ուսումնասիրելով գործի նյութերը, արձանագրել է, որ պատասխանողի արտահայտությունները կրել են գնահատողական դատողության բնույթ և արտահայտել են նրա անձնական կարծիքը հանրային հետաքրքրություն ներկայացնող հարցերի վերաբերյալ։ Ընդգծվել է նաև, որ հարցազրույցների ընթացքում Ազատ Արշակյանը բազմիցս նշել է, որ արտահայտում է իր կարծիքը, իսկ օգտագործված սուր և երբեմն ոչ կոռեկտ ձևակերպումները եղել են խոսքի ազդեցությունն ուժեղացնելու ոճական միջոցներ։
Արդյունքում դատարանը եզրահանգել է, որ տվյալ դեպքում առկա չէ զրպարտության համար պատասխանատվության հիմք, իսկ արտահայտությունները գտնվում են խոսքի ազատության պաշտպանության ներքո։ Այսպիսով, Սամվել Կարապետյանի ներկայացրած հայցը ամբողջությամբ մերժվել է՝ առանց բավարարման թողնելով հրապարակային հերքման, ներողության և փոխհատուցման պահանջները։
