Վերջին օրերում հայաստանյան լրատվամիջոցներում, մասնավորապես, «Առավոտ» եւ «Նովոյե վրեմյա» թերթերում հրապարակումներ են եղել այն մասին, որ Հայաստանի դիվանագիտական ներկայացուցչությունները, որոշ դեպքերում, ղեկավարում են այլ պետությունների քաղաքացիները։ Համապատասխանում է արդյոք դա իրականությանը եւ որքանո՞վ է համապատասխանում միջազգային նորմերին։
ԱՐՍԵՆ ԳԱՍՊԱՐՅԱՆ. ԱԳՆ խոսնակ
1. Արտասահմանում ՀՀ դիվանագիտական ներկայացուցիչների նշանակումը կարգավորվում է ՀՀ Սահմանադրությամբ (55-րդ հոդվածի 8-րդ կետ) եւ «ՀՀ դիվանագիտական աստիճանների մասին» ՀՀ օրենքով, որոնց դրույթները չեն արգելում արտասահմանում Հայաստանի Հանրապետության քաղաքացի չհանդիսացող անձանց ՀՀ դիվանագիտական ներկայացուցիչ նշանակելը։ Միաժամանակ 1961 թ. Վիեննայի Դիվանագիտական հարաբերությունների մասին կոնվենցիայի 8-րդ հոդվածի համաձայն, որը հանդիսանում է ՀՀ օրենսդրական համակարգի բաղկացուցիչ մասը եւ ունի առավել բարձր իրավաբանական ուժ, քան ներպետական նորմատիվ ակտերը, դեսպանընկալ պետության համաձայնության դեպքում այդ պետությունում ՀՀ դիվանագիտական ներկայացուցիչ կարող է նշանակվել, ինչպես դեսպանընկալ պետության քաղաքացի, այնպես էլ երրորդ պետության քաղաքացի հանդիսացող անձը։
2. Արտասահմանում ՀՀ քաղաքացի չհանդիսացող անձը որպես ՀՀ դիվանագիտական ներկայացուցչության ղեկավար իր պաշտոնեական պարտականությունների կատարմանն է անցնում այդ պետության համաձայնությունը ստանալուց եւ ՀՀ նախագահի կողմից ստորագրված հավատարմագիրը դեսպանընկալ պետության ղեկավարին հանձնելուց հետո (ՀՀ օրենքը «Արտասահմանում ՀՀ դիվանագիտական ներկայացուցիչների կարգավիճակի մասին»)։
Կարդացեք նաև
ՍՆԱՐՔ
