1999 թ. հոկտեմբերի 27-ի գործով նոյեմբերի 5-ին կասկածյալի կարգավիճակով ձերբակալվել էր Միսակ Մկրտչյանը (մասնագիտությամբ՝ դիզայներ)։ 2000 թվի ապրիլի 10-ին Մ. Մկրտչյանն առողջական վատ վիճակի պատճառով, սակայն ապօրինի զենք-զինամթերք ունենալու մեղադրանքով, ազատ է արձակվել՝ չբացակայելու մասին ստորագրությամբ։ Նշենք, որ դեպքից հետո Մ. Մկրտչյանի տանը կատարված խուզարկության ժամանակ զենք չի հայտնաբերվել, այլ տան տնտեսական պահարանում եղել է (թաքցրած չէր) որսորդական- սպորտային տիպի փամփուշտների (տոզի) 2 փակ տուփ. յուրաքանչյուր տուփի մեջ՝ հակառակ շարվածքով 50-ական փամփուշտներ։ Այդ փամփուշտները Մ. Մկրտչյանի տանը եղել են դեռ ղարաբաղյան շարժման տարիներից եւ, կարծես թե, դրանք լուրջ զինամթերք չեն համարվում։ Ի դեպ, որքան հայտնի է, Մ. Մկրտչյանն այդ տարիներին որոշ օգնություն է ցուցաբերել պատերազմի մասնակիցներին, անգամ մթին տեսնող հատուկ հեռադիտակ էր ուղարկել դաշտ, որի համար շնորհակալական գրություն էր ստացել։
Ի դեպ, երեկ դիմեցինք Մ. Մկրտչյանին՝ որոշ հարցերի պատասխաններ ստանալու համար, սակայն Մ. Մկրտչյանը հրաժարվեց խոսել՝ առողջական վատ վիճակի բացատրությամբ։
