«Դոմոդեդովո» օդանավակայանի մաքսային ծառայողները բերման են ենթարկել Հայաստանից ժամանած Ռուսաստանի քաղաքացու, որն իր հետ ռադիոակտիվ բեռ էր տեղափոխում: Այս մասին հայտնել են Դաշնային մաքսային ծառայությունից: Գրում է «Պրավդա» թերթը:
«Դոմոդեդովոյի մաքսային աշխատակիցները Երևան-Մոսկվա չվերթի ուղևորների մաքսային ստուգման ժամանակ կանգնեցրել են քաղաքացու, որի ուղեբեռում ռադիոակտիվ իր կար: Երբ ուղևորն անցնում էր «կանաչ» միջանցքով, համապատասխան ազդանշան է արձակել ռադիոակտիվ նյութերի հանդեպ զգայուն «Յանտար» սարքը», – ասված է ծառայության հաղորդագրությունում:
Նշված է, որ ուղևորի բեռը 23 անգամ գերազանցում է ճառագայթման նորման: Տղամարդու պայուսակում հայտնաբերվել է կապույտ տուփ՝ վրան արտադրողի պիտակը: Ուղևորի խոսքերով, նա Հայաստանում գտնվում էր գործուղման մեջ և իր հետ բերել է ուղղաթիռների շարժիչների բլոկ:
Պատրաստեց Հովհաննես ԻՇԽԱՆՅԱՆԸ
