Այսօր Ալավերդի զորահավաքի համար այցելած Րաֆֆի Հովհաննիսյանը բնակիչների հետ հանդիպմանը խոսեց «Վալլեքս» ընկերությունից եւ ընկերության պատասխանատուներին կոչ ուղղեց: Նա նշեց, որ «Ով աշխատատեղ է ստեղծում՝ մեզ վրա լավ տպավորություն է թողնում՝ «Վալլեքս» է անունը, թե մեկ ուրիշ՝ խնդրեմ, թող բացեն աշխատատեղեր, ժողովրդին հնարավորություն տան, խնդրեմ, կողմ եմ, շնորհակալ եմ: Բայց այսօր Նոյեմբերյանից առավոտը գալիս ենք Ալավերդի, «Վալլեքսով» անցնում ենք, ի՞նչ ենք տեսնում ձախի վրա՝ «Հանուն հայրենիքի, հանուն հավատքի, հանուն միասնության, հանուն բնության»: Նախ աշխատատեղ ստեղծեք, բայց երկրորդը՝ միլիարդները ձեր ջեբը չգցեք եւ միլիարդներ ստեղծելով՝ ժողովրդին խեղճուկրակ չպահեք: Կրկնապատկե՛ք իրենց աշխատավարձերը: Ձեր միլիարդների շահույթը կիսե՛ք ժողովրդի հետ: Բացեք աշխատատեղերը, բայց ոչ ստրկանման ժողովրդին ենթարկեցրեք: Իսկ դրանից հետո ձեր պարտականությունն է Թեղուտից մինչեւ Ալավերդի մաքուր բնություն, ընդերք, որը պատկանում է բոլորիս: Յուրաքանչյուր հայ քաղաքացի, ալավերդցի, պիտի ստանա իր մասնաբաժինը մեր ընդերքից, իր կտոր մաքուր օդը, իր բաժին հարստությունը: Ոչ թե քաղցկեղով՝ ռակով տառապող մեր երեխաները, թոռները, որ հետո ուղարկեք Երեւան ու չգիտեմ որտեղ ու ասեք՝ էս ո՞նց եղավ, որ մեր երեխաների 20 տոկոսը քաղցկեղով հիվանդ են, դա որտեղի՞ց է: Դրա համար, սիրելի՛ հայրենակիցներ, ինձ սխալ չհասկանաք»:
Շուտով Րաֆֆի Հովհաննիսյանը հանդիպում կունենա արդեն Վանաձորում:
Հանդիպումը հեռարձակվում էր civilnet.am-ի ուղիղ եթերով:
Հռիփսիմե ՋԵԲԵՋՅԱՆ
