Մարտի 26-ին Ստրասբուրգում Եվրոպայի խորհրդի Տեղական եւ տարածաշրջանային իշխանությունների Կոնգրեսի հանդիպման ժամանակ ուսումնասիրվել է տեղական ժողովրդավարությունը Հայաստանում թեմայով զեկույցը: Գրում է Եվրոպայի խորհրդի պաշտոնական կայքը:
Կոնգրեսի զեկուցող Նիգել Մերմագենը (Միացյալ Թագավորությունից) ողջունեց Հայաստանի իշխանությունների ջանքերը, որոնք ուղղված են իրականացնելու Եվրոպական խարտիայի կողմից ընդունված Տեղական ինքնակառավարման մարմինների մասին դրույթները, մասնավորապես ներկայացնելով 2005 եւ արդեն 2008 թվականին ընդունված նոր օրենսդրությունը: Նա մատնանշեց. «Հայաստանյան տեղական ինքնակառավարման մարմինները ունեն սահմանափակ դեր: Գործնականում հայաստանյան տեղական ինքնակառավարման մարմինները միշտ չէ, որ ունեն ամբողջովին եւ բացառիկ իշխանություն, տեղական ինքնակառավարման մարմինները առավել շատ ծառայում են որպես կենտրոնական կառավարության գործակալներ, քան ինքնավար դերակատարներ հանրային կառավարման ոլորտում: Ավելին, գոյություն ունեցող բազմաթիվ փոքր եւ թույլ վարչական բաժանումները շարունակում են մնալ կառուցվածքային խնդիր Հայաստանի համար»:
Այնուամենայնիվ Կոնգրեսը կոչ է արել Հայաստանի իշխանություններին վերանայել օրենսդրությունը՝ ավելի կատարելագործելու տեղական ինքնակառավարման իշխանությունների աջակցման սկզբունքները:
«Մենք կոչ ենք անում Հայաստանի իշխանություններին կատարելագործել տարածքային կառավարումը՝ խրախուսելով միջհամայնքային համագործակցությունը, ուժեղացնելով համայնքի ավագանու հզորությունը եւ սահմանափակելով ադմինիստրատիվ հսկողությունը»,- ասել է պարոն Մերմագենը:
