Ի թիվս այլ մտավորականների, Գեղարվեստի ակադեմիայի ռեկտոր, գեղանկարիչ Արամ Իսաբեկյանը եւս մասնակցել է օրերս Պռոշյանի տուն-թանգարանում վարչապետ Հովիկ Աբրահամյանի հետ կայացած հանդիպմանը:
Aravot-ը պարոն Իսաբեկյանից հետաքրքրվեց՝ ի՞նչ տպավորություն է ստացել այդ հանդիպումից եւ ի՞նչ ուղերձ ուներ այն: «Գնահատելի է, որ վարչապետը ցանկանում է հանդիպել մտավորականների, արվեստագետների հետ եւ մեր կյանքի անցուդարձի վերաբերյալ իրենց կարծիքն իմանալ ու մտահոգությունները «կիսել»: Դա էր ամբողջը, ուրիշ բան չի եղել»,-պատասխանեց Արամ Իսաբեկյանը:
Հարցրինք՝ օրինակ ինքը որպես Գեղարվեստի ակադեմիայի ռեկտոր, իրենց բուհի վերաբերյալ որեւէ հարց ուղղե՞լ է վարչապետին: «Այդպիսի հանդիպում չէր, որ ամեն մեկը իր դարդուցավը պատմեր, ուղղակի առիթ էր ժողովրդի, երիտասարդության, մշակույթի մասին խոսելու»,-ասաց մեր զրուցակիցը:
Մեր դիտարկմանը, թե որոշ մտավորականների շրջանում կարծիք կա, որ Պռոշյանի տուն-թանգարանում կայացած հանդիպումը ինչ-որ տեղ նաեւ մշակույթի նախարար Հասմիկ Պողոսյանի հրաժեշտի առիթով հավաքույթ էր, Գեղարվեստի ակադեմիայի ռեկտորը չհամաձայնեց: «Նման տպավորություն չեմ ստացել, նման հարց չի եղել եւ առաջին անգամ եմ լսում»,-ասաց Արամ Իսաբեկյանը:
Կարդացեք նաև
Գոհար ՀԱԿՈԲՅԱՆ
