«Հայկական կառավարությունը պիտի ընդհանուր շփման միջոցներ փնտրի ոչ միայն սփյուռքահայ մեծահարուստների, այլև հասարակ ժողովրդի հետ: Հայ ժողովուրդը դժբախտաբար ցրված է աշխարհով մեկ, բայց պետք է դրանից խելամիտ օգտվելու միջոցներ գտնել»,- ասաց «Եվրոպայի hայերի hամագումարի» նախագահ, գրող, հրապարակախոս Կարո Հակոբյանը մարտի 3-ին «Հայացք» մամուլի ակումբում տեղի ունեցած հանդիպման ժամանակ:
«Եվրոպայի hայերի hամագումարի» նախագահը հավատացած է` եթե Հայաստան-Սփյուռք հարաբերությունները լավ լինեն, կշտկվի նաև երկրի ներքին քաղաքական ու տնտեսական վիճակը: «Սակայն ցանկություն և քաղաքական կամք չկա համագործակցելու, միայն ուզում են իրենց կամքը պարտադրել Սփյուռքին: Եթե նպատակը երկրի զարգացումն է, ապա երկկողմ հարաբերութուններ պիտի լինեն»,- ասաց նա:
Անդրադառնալով առաջիկա խորհրդարանական ընտրություններին՝ Կարո Հակոբյանը նշեց, որ պետք է ամուր կառույց ստեղծել, հավատ ներշնչել, որ մարդիկ մասնակցեն ընտրություններին: Նրա խոսքով ընտրությունները պրոցես են, ոչ թե նպատակ, սակայն շատ քաղաքական ուժեր արթնանում են միայն ընտրություններից առաջ ու ուզում ինչ-որ բան անել ընտրությունների արդյունքում հաղթանակած դուրս գալու համար:
«Ժողովրդի հասարակական և քաղաքական գիտակցության բարձրացումն ամենամեծ անհրաժեշտությունն է: Այսօր մարդ անհատի և հասարակության միջև եղած հարաբերությունը խզվել է, ինչն էլ դրդում է մարդկանց կաշառք վերցնել: Եթե անհատն իրեն տեսնի հավաքական ուժի մեջ, ապա հավաքականի շահը թույլ չի տա այդ կաշառքը վերցնել: Դա հնարավորություն կտա մտածել ու գործել այնպես ինչպես ինքն է ցանկանում: Եթե հասարակությունը հասնի այն կետին, որ իր ձայնը տա նրան, ում ցանկանում է, ապա նա այդ ձայնն էլ կպահանջի: Իշխանությունները ստիպված կլինեն նահանջել»,- խոսքն այսպես եզրափակեց Կարո Հակոբյանը:
Կարդացեք նաև
Մելանի ՍԱՐԳՍՅԱՆ