«Իսկ ի՞նչ է արել քաղաքապետարանը: Մինչ օրս կոսմետիկ փոփոխություններ ենք տեսել, որոնք իրականացվել են մայթեզրերին թեքահարթակներ տեղադրելու միջոցով»,-«Հենարան» մամուլի ակումբում այսօր անդրադառնալով հարցին, թե ի՞նչ ձեռքբերումներ ունի Երեւանի քաղաքապետարանը՝ հաշմանդամություն ունեցողների իրավունքների պաշտպանության գործում, ասաց մայիսի 14-ին կայանալիք Երեւանի ավագանու ընտրություններին մասնակցող «ԵԼՔ» դաշինքի ավագանու թեկնածու Զարուհի Բաթոյանը:
Նա շեշտեց, որ նորոգվող կամ կառուցվող շինությունների դեպքում օրենքը պահպանված չէ, հաշմանդամություն ունեցողների կարիքները հաշվի չեն առնում. «Որեւէ մեկը սխալ կառուցելու համար չի պատժվում, չի տուգանվում»:
Զարուհի Բաթոյանի փոխանցմամբ՝ ավագանիում մեծամասնություն կազմելու դեպքում «ԵԼՔ»-ը մշակված ծրագրեր ունի: Նախ, քաղաքապետարանում ստեղծել հաշմանդամություն ունեցողների իրավունքների պաշտպանության վարչություն, որն ամենօրյա աշխատանքով կզբաղվի ծրագրերի մշակմամբ եւ խնդիրների ուսումնասիրությամբ:
«Ըստ մեր ծրագրի՝ ամեն վարչական շրջանում մեկ դպրոց ամբողջությամբ կհարմարեցվի հաշմանդամություն ունեցողներին, նաեւ կստեղծվի ժեստերի լեզվի ուսուցման կենտրոն»,-հայտնեց բանախոսը:
Կարդացեք նաև
Թեմայի շուրջ այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
