ԵՊՀ ուսանողների հետ տարվող աշխատանքների կենտրոնի ծրագրերի համակարգող Էդգար Գալստյանն այսօր գործադուլ է հայտատարել եւ միացել ԿԳՄՍ նախարարության դիմաց նստացույց անող ՀՅԴ երիտասարդների եւ ԵՊՀ բանասիրության ֆակուլտետի ուսանողների մի մասի պահանջին՝ նախարար Արայիկ Հարությունյանի հրաժարականը: «Այս երիտասարդները դուրս են եկել փողոց՝ պայքարելու ազգային մշակույթի եւ ազգային կրթության համար»,-նախարարության դիմաց հայտարարեց Էդգար Գալստյանը: Նա նշեց, որ ընկերներին եւ ուսանողներին էլ է կոչ արել դասադուլ եւ գործադուլ անել. «Այստեղ որեւէ մեկը մյուսի դեմ չի պայքարում: Բոլորս պայքարում ենք ազգային պետության համար:
Հնարավոր է, որ գործադուլի հետեւանքով զրկվենք աշխատանքից, բայց բոլորս ամեն ինչ պետք է անենք, որ ՀՀ-ում հարգեն ազգային արժեքները»: Լրագրողների հետ զրույցում էլ Էդգար Գալստյանն ասաց՝ գործադուլ է անելու, մինչեւ Արայիկ Հարությունյանը հրաժարական տա. «Իրացնում եմ գործադուլ անելու իմ իրավունքը»: Հիշեցնենք, որ բողոքավոր ուսանողների խոսքով՝ նախարար Արայիկ Հարությունյանի քաղաքականությունը միտված է միասեռականության քարոզին եւ բուհերում հայոց լեզվի դասավանդումը բացառելուն, այդ պատճառով էլ իրենք դիմել են դասադուլի:
Լուիզա ՍՈՒՔԻԱՍՅԱՆ