Այսօր Երեւանի ընդհանուր իրավասության դատարանի Շենգավիթի նստավայրում շարունակվում է «Ռոբերտ Քոչարյանի եւ մյուսների գործով» դատավարությունը: Նախորդ նիստում դատավոր Աննա Դանիբեկյանը հեռացել էր խորհրդակցական սենյակ`Ռոբերտ Քոչարյանի նկատմամբ քրեական հետապնդումը դադարեցնելու եւ քրեական գործը կարճելու մասին միջնորդության վերաբերյալ որոշում կայացնելու համար:
Այսօր դատավորը հայտարարեց դատարանի որոշումը. «Պաշտպանության կողմի միջնորդությունների լուծումը հետաձգել`մինչեւ դրանց լուծման համար էական հանգամանքների պարզումը`գործում առկա բոլոր ապացույցների հետազոտումով»:
Հիշեցնենք, որ Ռոբերտ Քոչարյանի և Արմեն Գևորգյանի, Սեյրան Օհանյանի և Յուրի Խաչատուրովի փաստաբանները միջնորդել են դադարեցնել իրենց պաշտպանյալների նկատմամբ քրեական հետապնդումը և կարճել քրեական գործի վարույթը։
Պաշտպանների միջնորդության հիմքում ընկած է հայտնի «Յոթի գործը»։ Նշված գործով անցնող յոթ մասնակիցների նկատմամբ քրեական հետապնդումը դադարեցվել է 300.1-րդ հոդվածի համաձայն:
Կարդացեք նաև
Միջնորդության քննարկման ընթացքում պաշտպանական կողմը ընդգծել էր, որ նախկինում գործող Քր․ դատ․-ի 300 հոդվածը չի համապատասխանել իրավական որոշակիության սկզբունքին։ Հետագայում ընդունված 300․1 հոդվածը, որը, չնայած որ նոր հանցակազմ է պարունակում, նույնպես չի համապատասխանում իրավական որոշակիության սկզբունքին։
Պաշտպանական կողմի միջնորդությունները մեկ որոշմամբ են կայացվել. դրանք կողմին կտրամադրվեն մեկ աշխատանքային օրվա ընթացքում:
Դատական նիստը շարունակվում է:
Նելլի ԳՐԻԳՈՐՅԱՆ
