«Այսօր ամբողջ Հայաստանը սրտիկների մեջ է։ Ամենուր սրտիկներ են։ Մի քիչ էլ, ու կհայտնվեն այլ օրգաններ՝ երիկամներ, էլի ինչ-որ բան։ Կարծում եմ՝ դա արվում է ցույց տալու համար, թե իբր իշխանությունները ձեզ սիրում են։ Դա ուղերձ է։ Իբր թե սիրում է երկիրն ու ժողովրդին։ Նորմալ մարդն ի՞նչ նկատի ունի՝ ասելով սիրել երկիրը և սիրել ժողովրդին։
Ենթադրվում է, որ սիրել երկիրը՝ նշանակում է երկրի դարպասները փակ պահել։ Այդպե՞ս է։ Ո՛չ։ Ուրեմն՝ չի սիրում։ Ի՞նչ է նշանակում սիրել ժողովրդին։ Առաջին հերթին՝ ապահովել ժողովրդի անվտանգությունը։ Ի՞նչ արեցին։ Հրահրեցին պատերազմ, պարտվեցին այդ պատերազմում, տվեցին 5 հազար զոհ, 12 հազար վիրավոր, տարածքային կորուստներ։ Սա՞ է ձեր սերը»,- այսօր Մալաթիա-Սեբաստիա վարչական շրջանի բնակիչների հետ նախընտրական հանդիպման ժամանակ ասաց ԱԺ «Հայաստան» դաշինքի վարչապետի թեկնածու, ՀՀ 2-րդ նախագահ Ռոբերտ Քոչարյանը։
Կարդացեք նաև
Ըստ նրա՝ կան մարդակեր ցեղեր, որոնք նույնպես սիրում են մարդկանց, բայց այլ նպատակներով, ավելի շատ սիրում են մարդկանց մարմնի տարբեր մասերը՝ ինչ-որ բան ավելի շատ, ինչ-որ բան՝ ավելի քիչ. «Մենք մարդակերի սիրո կարիք չունենք։ Այդ սերն ուղղեք մեկ այլ ուղղությամբ, այդ սերն ուղղիր դեպի Ադրբեջան»։
Արփինե ՍԻՄՈՆՅԱՆ
