Այս փաստարկով է երեկ վարչապետ Արամ Սարգսյանը հրաժարվել լրագրողներին հայտնել, թե ովքեր են մնալու հին կառավարությունից
Նա հաստատել է, թե Ռոբերտ Քոչարյանը համաձայն է եւ հավանություն է տվել կառավարության փոփոխություններին. «Նախագահի գրասենյակը պատասխանել է դրան։ Իմ հանդիպման ժամանակ նա բանավոր գոհունակություն է հայտնել»։ Սակայն Արամ Սարգսյանը բացահայտել է, թե նախագահն այնքան էլ տեղյակ չէ այս փոփոխություններից. «Կառուցվածքի վերաբերյալ ոչ ամբողջությամբ, բայց հիմնականում տեղյակ է»։
Արդյոք հնարավո՞ր է, որ Ռոբերտ Քոչարյանը մերժի կառավարության նոր կազմի առաջարկը. «Իմ կարծիքով, հանրապետության նախագահը լավ առաջարկները չի մերժում»։ Ի դեպ, Արամ Սարգսյանը մի այսպիսի խոստովանություն է արել. «Ես հիմնականում ամբողջ կյանքում նման բաներ էլ արել եմ։ Արել եմ այնպիսի առաջարկներ, որոնք չեն մերժվել»։ Գրեթե կնքահոր պես, որն առաջարկներ էր անում, որոնք հնարավոր չէր մերժել։ Արամ Սարգսյանը բացասական է պատասխանել այն հարցին, թե արդյոք փոխվելու են ուժային նախարարները։ Այն հարցին, թե ինչ նպատակ էր հետապնդում կառավարությունը բազմակուսակցական դարձնելը, վարչապետը հարցով է պատասխանել. «Իսկ ո՞վ է ասում, որ կառավարությունը բազմակուսակցական է լինելու»։
Լրագրողների հիշեցմանը, թե ԱԺՄ-ն ու կոմկուսն էլ են կուսակցություններ, պրն Սարգսյանը դարձյալ հարցով է արձագանքել. «Իսկ ո՞վ է ասում, որ ես առաջարկել եմ պորտֆելներ կոմունիստներին եւ ժողովրդավարներին»։ Այն հարցին, թե ճի՞շտ է, որ այս նախաձեռնությունը երկրապահական շրջանակների մի մասի խուլ դժգոհությունն է առաջացրել, վարչապետը պատասխանել է. «Ուղղակի չարախոսություն է։ Չեմ կարծում։ Հանդիպել եմ «Երկրապահի» հետ, ինձ էլ էին նման լուրեր հասել։ Բառիս բուն իմաստով, այս հարցով որեւէ պրոբլեմ չկա»։
Կարդացեք նաև
Ինչեւէ, վարչապետը հայտարարել է, որ ստանձնում է ամբողջ պատասխանատվությունը։
Ա. Ի.
