Ինչպես արդեն տեղեկացրել ենք` Հայաստանում 12 ամիսների գնաճը կազմել է 4.4%, իսկ այս տարվա 4 ամիսների գնաճը կազմել է 1.7%:
Այսօր «Հենարան» ակումբում ՀՀ ազգային վիճակագրական ծառայության գների վիճակագրության եւ միջազգային համադրումների բաժնի պետ Գուրգեն Մարտիրոսյանն ասաց, որ այս տարվա ապրիլին` մարտ ամսվա համեմատ, պարենային ապրանքերի գնաճը կազմել է 1%, ոչ պարենային ապրանքների մասով 0.1% գնանկում է գրանցվել, ծառայությունների ոլորտում` 0.1% գնաճ:
ԱՎԾ տվյալներով` առավել բարձր գնաճ է արձանագրվել բանջարեղեն-կարտոֆիլ ապրանքախմբում ` 5.4%, միրգ ապրանքախմբում` 1.8%, կաթնամթերքը`2.1%, ոչ ոգելից խմիչքները 0,1%-ով թանկացել են, ոգելից խմիչքներն ու ծխախոտը թանկացել են 0.2%-ով:
Պարոն Մարտիրոսյանի ներկայացմամբ` վերջին 10 տարիների ընթացքում ամենացածր գնաճն արձանագրվել է 2007 եւ 2012 թվականներին` 2.1%, իսկ առավել բարձր գնաճ է եղել 2008 թվականին` 6%:
Կարդացեք նաև
Գուրգեն Մարտիրոսյանի դիտարկմամբ` այս տարվա ցրտահարությունն էլ մեծամասամբ ազդեց բանջարեղենի թանկացման վրա. օրինակ`
կարտոֆիլի գները վերջին մեկ ամսում աճել են 21.8%,կաղամբինը` 67.6%, գազարինը` 52.9%: ԱՎԾ տվյալներով` կրթության ոլորտում 7.6% գնաճ է արձանագրվել. հիշեցնենք, որ անցյալ տարի ուսումնական հաստատություններում վարձավճարները բարձրացան: ԱՎԾ տվյալներով, հանգստի կազմակերպման ոլորտում էլ 1.4% գնաճ է եղել, հանրային սննդի ոլորտում` 2.2%, իսկ իրավական եւ բանկային ոլորտում, պարոն Մարտիրոսյանի ներկայացմամբ` գների նվազում է արձանագրվել: Տրանսպորտային ոլորտում եւս գնանկում է եղել. Գուրգեն Մարտիրոսյանի ներկայացմամբ` տրանսպորտային ոլորտի` 7.1% գնանկումը հատկապես պայմանավորված է օդային տրանսպորտի`օդային ուղեւորափոխադրումների ոլորտում արձանագրված գների նվազման հետ:
Նելլի ԲԱԲԱՅԱՆ
