«Մեր երկիրը կանգնած է համակարգային խնդիրների առջեւ»,- հունիսի 26-ին «Հայելի» մամուլի ակումբ լրագրողների հետ հանդիպման ընթացքում ասաց ԿԲ նախկին նախագահ Բագրատ Ասատրյանը:
Ըստ նրա այդ համակարգային խնդիրների լուծման համար չորս առանցքային խնդիր կա՝ կոռուպցիան, մենաշնորհները, սոցիալական խայտառակ վատ վիճակը եւ սոցիալական բեւեռացումը:
Նա համարում է, որ Հայաստանում մենաշնորհները տնտեսական երեւույթ չեն. նախեւառաջ քաղաքական են, այնուհետեւ՝ տնտեսական, հետո՝ ֆինանսական. «Մի քաղաքական ուժի անբովանդակ, անորակ, դրսեւորումները վերջին օրերին տեսաք, կարծում եմ՝ դրանից ավելի ցայտուն ապացույց չկա: Տեսաք պատգամավորների բարձր ինտելեկտը, երբ որ խոսում են պարզ, առօրյա սոցիալական խնդիրների մասին: Տեսաք ինտելեկտի բացակայությունը եւ որեւէ ցանկությունը ինչ-որ մի մոտեցում, դրսեւորում, զարգացում կիրառել, սկսած դրանից, մինչեւ բուն խնդիրները: Այս շարժումը՝ «Ոչ թալանին» հակակոռուպցիոն շարժում կարելի է համարել»:
Կարդացեք նաև
Բագրատ Ասատրյանը նկատեց, որ տարածաշրջանում աղքատության ամենաբարձր ցուցանիշը Հայաստանում է, նա նշեց, որ պատմության մեջ նման բան չի եղել. «Ադրբեջանում մոտավորապես հինգ-վեց անգամ ավելի ցածր է: Աղքատության շեմը Հայաստանում օրական մեկ շնչին 2.5 դոլարից ցածր եկամուտն է: Ադրբեջանում այդ շեմը օրական 5 դոլարն է: Այսինքն՝ կրկնապատիկ անգամ ավելի բարձր շեմի պարագայում 5-6 անգամ ավելի ցածր է աղքատների թիվը: Դա մեր իշխանությունների գործունեության ուղղակի հետեւանքն է»:
Իսկ սոցիալական բեւեռացումը, ըստ նրա, հասարակության զգալի հատվածին զրկում է զարգացման եւ հասարակական կյանքին մասնակցելու որեւէ հնարավորությունից. «Այսօր ձեւավորվում է մի հատված, որը հնարավորություն չունի երեխաներին տարրական կրթություն տալ, եւ հակառակը՝ մենք ունենք մի հատված, որն իշխող դիրք ունի, նա բացի ֆինանսականից, բացի տնտեսականից տիրապետում է նաեւ քաղաքական, վարչական լծակներին»:
Ամի ՉԻՉԱԿՅԱՆ
