Հուլիսի 8-12-ը Երևանում կանցկացվի Ցեղասպանագետների միջազգային ընկերակցության 12-րդ գիտական կոնֆերանսը՝ «20-րդ դարի ցեղասպանությունների համեմատական վերլուծությունը» թեմայով:
«Գիտական այսպիսի կոնֆերանս Հայաստանում երբեք չի եղել, համենայն դեպս, ցեղասպանագիտության և Հայոց ցեղասպանության ուսումնասիրության ոլորտում»,- այսօր լրագրողների հետ հանդիպման ժամանակ ասաց Հայոց ցեղասպանության թանգարան-ինստիտուտի տնօրեն Հայկ Դեմոյանը:
Նրա խոսքով՝ կոնֆերանսի ընթացքում անդրադարձ կլինի ոչ միայն Հայոց ցեղասպանությանը, այլև 20-րդ դարի բոլոր ցեղասպանություններին՝ ներկայացնելով դրանց համեմատական վերլուծությունը: Ընդհանուր առմամբ, կներկայացվի 130 զեկույց:
«Այս տարի Հայոց ցեղասպանությանը վերաբերող զեկույցների թիվը հասնում է շուրջ երկու տասնյակի: Մինչդեռ, նախկինում հազիվ 4-5 զեկույց էր ներկայացվում»,- տեղեկացրեց Հայկ Դեմոյանը՝ նկատելով, որ ներկայացվող զեկույցները, համեմատական վերլուծություն լինելով հանդերձ, խիստ շահեկան են մեզ համար:
Կարդացեք նաև
Երևանում անցկացվելիք կոնֆերանսը Դեմոյանը կարևորում է նաև Ցեղասպանության 100-րդ տարելիցին նվիրված միջոցառումների շարունակականության առումով. «Մենք շարունակում ենք անցկացնել մշակութային, ակադեմիական և այլ միջոցառումներ, որոնք այս կամ այն կերպ առնչվում են Հայոց ցեղասպանության 100-րդ տարելիցին: Հաշվի առնելով գիտական ասպեկտը՝ անհրաժեշտ է նշել, որ սա բավականին ներկայացուցչական և մեծ կոնֆերանս է»,- ասաց Հայոց ցեղասպանության թանգարան-ինստիտուտի տնօրենը:
«Տարիներ առաջ էլ ենք մենք զեկույցներ ունեցել Հայոց ցեղասպանության թեմայով, բայց դրանցում միայն նշված է եղել, որ դա ցեղասպանություն է, և որ դա չի կարելի ժխտել։ Իսկ այս կոնֆերանսին ներկայացված զեկույցները Հայոց ցեղասպանության ուսումնասիրության մասին ավելի շատ նրբություններ են պարունակում»,- ասաց Ցեղասպանագետների միջազգային ընկերակցության փոխնախագահ, Երևանում 12-րդ գիտական կոնֆերանսի կազմակերպչական հանձնաժողովի նախագահ Դոննա Լի Ֆրիզը։
Սիրանուշ ՀԱՅՐԱՊԵՏՅԱՆ
Լուսանկարը՝ Հայոց ցեղասպանության թանգարան-ինստիտուտի
