«Ոչ թալանին» նախաձեռնությունը հնարավոր է՝ կրկին դուրս գա փողոց: Սակայն դեռ կոնկրետ ռազմավարություն չեն մշակել, փորձում են հասկանալ, թե ինչպե՞ս են ուզում զարգացումներն ուղղորդել ՀՀ իշխանությունները: Հայտնի է, որ մեկ օր առաջ «Դելոյթ եւ Տուշ» խորհրդատվական ընկերությունը հայտարարեց, որ հոսանքի թանկացման ՀԾԿՀ որոշումը հիմնավորված է: «Առավոտի» հարցին՝ ըստ էության կատարվածը աուդիտ չէր, հետեւաբար «Ոչ թալանինն» իրեն խաբված չի՞ զգում, նախաձեռնության անդամ Մաքսիմ Սարգսյանը պատասխանեց. «Ինչի՞ մեզ, ողջ ժողովրդին են խաբել»:
Մեր այն հարցին՝ իշխանությունները մարսելո՞ւ են այս ամենը, թե՞ իրենք կրկին դուրս են գալու փողոց, Մաքսիմ Սարգսյանը պատասխանեց, թե ոչինչ բացառված չէ, ուղղակի իրենց ժամանակ է պետք՝ հասկանալու, թե սահմանադրական «բարեփոխումների» ֆոնին հոսանքի սակագնի հարցը ուր են ուզում տանել ՀՀ իշխանությունները: Մաքսիմ Սարգսյանը նաեւ վրդովվեց, որ Սամվել Կարապետյանին «բարի քեռի են» ներկայացնում ու ասաց. «Մեկ տարի նրա կողմից սուբսիդավորումը ոչ մեկին պետք չէ, մենք այդ ողորմության, կոպեկների կարիքը չունենք, մենք խնդիր ունենք, որ մեզ չխաբեն ու այս ապօրինի որոշումը չեղարկեն»:
«Առավոտ» օրաթերթ
02.10..2015
