ՀՀ-ում որոշ քաղաքական գործիչներ Ռուսաստանի գաղութատիրությունից ազատագրվելու համար ժողովրդին հորդորում են հրապարակավ հնչեցնել հակառուսական կոչեր:
Ի՞նչ անել, հետևել հորդորին ու գնալ Ռուսաստանի հետ առճակատմա՞ն, թ՞ե շարունակել նրա ետևից քարշ գալ: Ո՛չ մեկը և ո՛չ էլ մյուսը, պարզապես կանգ առնել…
Ռուսին դեմ գնալը դա «տեղ» չի, ուր կարելի է գնալ…
Թե՛ ետևից, թե՛ առճակատման գնալու պարագայում մենք կրկին նրա հետ ենք լինելու: Դա նման է պտտվող անիվում դեմ հանդիման վազող երկու սկյուռի:
Կարդացեք նաև
Պետք չէ կոչերով ավելի ռուսատյաց դառնալ (եղածը բավական է) ու հեռացնել հասարակության միտքը իրավական պետություն կերտելու ճանապարհից, ուղեցույց հոգին բթացնել և էներգիան վատնել կույր ատելության վրա:
Հակառուսական կոչերը բնականաբար կլինեն մեղադրանքների տեսքով, ի վերջո վեճը կվերածվի լեզվակռվի, որն էլ Մոսկվային առիթ կտա հերթական անգամ գլորել մեզ վրա ռուսական պրոպագանդայի տակառը:
Այդժամ պարտությունը երաշխավորված է, քանզի լավրովները, մարկովները, կուրղինյանները… փայլուն տիրապետում են դեմագոգիայի արվեստին և չափազանց ուժեղ են իրենց մակարդակում:
Եթե դրան ավելացնենք մեր զարկերակի վրա ձեռքը պահած ռուսական ԶԼՄ-ները, ՀՀ-ում նրա լրտեսական ցանցերը, հպատակ ՀԿ որջերը… ապա, տեսնում ենք, որ կայսրությունը լիովին վերահսկում է ՀՀ իրականությունը:
Նման վիճակում, ռուսի հետ, եթե մեջլիս մտնենք (ժողովրդի լեզվով) մի բան էլ մենք նրան պարտք կմնանք:
Բաց առճակատման հետևանքն էլ մեր աչքի առաջ է՝ Ուկրաինան: Չենք կրկնօրինակել և չենք էլ կրկնօրինակի նրա մարտավարությունը: Մենք ուրիշ ենք:
Ռուսի հետ պարզունակ առճակատումը, որպես միաբևեռ գործողություն մեզ կանգնեցնելու է նոր դաշնակից որոնելու փաստի առաջ: Նկատենք, որ «դաշնակից» ասածը բռնազավթված երկրի համար չէ:
Մեր հույսը մենք ենք և մեր ժողովրդական դիվանագիտությունը:
Չբողոքել, չխնդրել, չսպառնալ:
Սեփական կառավարության համար՝ միայն պատանդի վիճակ, ռուսի հետ՝ միայն գործարք:
ՆԱՏՕ-ն մեզ զենք տալու խոստում կտա՝ դիմացը ռուսական 102-րդ ռազմաբազան ՀՀ-ից դուրս հրավիրելու խոստում կստանա: Իրականում զենք կտա՝ 102-րդ ռազմաբազան իրականում էլ դուրս կգա:
Նման գայթակղիչ խոստումների սոսկ շրջանառումը Ռուսաստանին խորհելու տեղիք կտա, շարունակել մեզ խաբե՞լ, թե՞ խոստացած զենքը ՀՀ ուղարկել:
«Մեծ եղբորից» ենթադրվող զենքը ստանալուց հետո կարելի է նրա ականջին հասցնել, որ պայմանները փոխվել են և ԱՄՆ, Ֆրանսիան… մտադիր են ԼՂՀ -ը ճանաչել:
Մի կասկածեք, սա իրատեսական տարբերակ է. куда они денутся? Տարածաշրջանում մնալու նրա միակ պատրվակը մենք ենք, նա ստիպված է մեզանից կառչել: Կկորցնի Կովկասը՝ կմասնատվի կայսրությունը…
Ապրիլյան չորսօրյա պատերազմը ռուսների խաղաքարտերը խառնեց, նրանք համոզվեցին, որ հայ ժողովրդի դերը համաշխարհային քաղաքականության մեջ փոքր լինելով հանդերձ կարող է գերտերությունների համար վճռորոշ լինել:
Հիշենք, որ ի վերջո հայտնվելու ենք այնտեղ, որտեղ մեր մտքերն են: Ուստի անհրաժեշտ է հնչեցնել բացառապես հայամետ կոչեր:
Վահագն Կոզմոյան
30.09.2016
Պարզ, հստակ, հասկանալի…