«ՎԱԲԱ» ՍՊԸ-ն հիմնադրել է Վահրամ Բաղդասարյանը՝ 2002 թվականին, երբ պատգամավոր էր։ Մինչև 2018-ի փետրվարը՝ Արդվի գյուղի հարակից տարածքում ոսկու հանքավայրի շահագործման աղմուկի բարձրացումը, Վահրամ Բաղդասարյանը ընկերության միակ 100 տոկոսանոց բաժնետերն էր, սակայն ավելի ուշ ընկերության բաժնեմասերը նա փոխանցել է Վանաձորի ավագանու հանրապետական անդամ Վահագն Ավագյանին։
Նշենք, որ արտոնություն ստացած «ՎԱԲԱ» ընկերությունը Վանաձորում նախատեսում է կազմակերպել հակակարկտային ցանցերի համակարգի արտադրություն։ Այդ նպատակով կատարել 2․25 մլրդ դրամի ներդրում։
«Կարկտապաշտպան ցանցի արտադրությունը «ՎԱԲԱ»-ն իրականացնելու է իտալական Carmac group ընկերության հետ։ Արտոնությունն էլ ըստ էության նախատեսվում է արդեն ներկրված սարքավորումների մաքսազերծման համար։
ԱԺ ՀՀԿ խմբակցության ղեկավար Վահրամ Բաղդասարյանն արդեն հասցրել է հերքել իր մասնակցությունը և առնչությունը «ՎԱԲԱ» ընկերությանը։ «Գնացեք և ուսումնասիրեք, եթե այդ ընկերության փաստաթղթերում իմ անունը կգտնեք, ես ձեզ շնորհակալություն կհայտնեմ»,- ԱԺ-ում լրագրողների հետ զրույցում ասել է Բաղդասարյանը և հավելել. «Ես կապ չունեմ այդ ընկերության հետ, բայց լուրջ ջանքեր եմ գործադրել, որ իտալացիները գան Վանաձոր և ոչ միայն դրանով եմ բավարարվելու։ Մի քանի լուրջ ծրագրեր կան, և որքան հնարավոր է պետք է ներդրումներ ներգրավել»։
Վահրամ Բաղդասարյանը հաստատել էր, սակայն, որ ընկերությունը իր մտերիմ մարդկանց է պատկանում, և եթե այդ ներդրումային նախագծին հարկային արտոնություն չտրվեր կառավարության կողմից, մերժվեր, ապա կարող էր լուրջ աղմուկ բարձրացվեր, քանի որ հակակարկտային առաջին գործարանն է կառուցվել տարածաշրջանում, այդ սարքավորումները, որոնք արդեն մաքսատանն են, լուրջ պահանջարկ ունեն։
Նշենք, որ կառավարության կողմից հարկային արտոնություն տրամադրելու հարցում լուրջ մտահոգություններ կան։ Մտահոգություններ է տեսնում նաև ՀՀ գլխավոր դատախազությունը։ Այսօր կառավարության նիստում գլխավոր դատախազ Արթուր Դավթյանը նշեց, որ դատախազությունն այս ոլորտում ուսումնասիրություններ է սկսել։
Սոնա ՀԱՐՈՒԹՅՈՒՆՅԱՆ
Հոդվածն ամբողջությամբ՝ «Ժամանակ» թերթի այսօրվա համարում
