Հուլիսի 1-ին ՀՀ սփյուռքի գործերի գլխավոր հանձնակատար Զարեհ Սինանյանը ընդունել է Կանադայի Քվեբեկ նահանգում ՀՀ պատվո հյուպատոս Լևոն Աֆեյանին (նստավայրը՝ Մոնրեալ) և ԱՄՆ Իլինոյս նահանգում ՀՀ պատվո հյուպատոս (նստավայրը՝ Չիկագո), ինչպես նաև Ամերիկայի հայկական համագումարի համանախագահ Օսկար Թաթոսյանին։
Հանդիպման ընթացքում քննարկվել են Հայաստան-սփյուռք փոխգործակցությանը, ԱՄՆ-ում և Կանադայում հայկական համայնքներին, Հայաստանում վերջերս անցկացված հերթական խորհրդարանական ընտրություններին, ինչպես նաև Հայաստան-սփյուռք փոխգործակցության համատեքստում ներկա և հետագա առաջնահերթություններին առնչվող մի շարք հարցեր։
Հյուրերը շնորհավորել են Գլխավոր հանձնակատարին և ՀՀ կառավարությանը՝ արդար և ժողովրդավարական ընտրությունների անցկացման և դրանց արդյունքում իշխող կուսակցության հաղթանակի առթիվ՝ ընդգծելով հայ ժողովրդի և ՀՀ քաղաքացիների ընտրության, ինչպես նաև ՀՀ-ում ժողովրդավարական արժեքների շարունակական զարգացման ու ամրապնդման կարևորությունը՝ խորհրդարանական ընտրությունների, ինչպես նաև տարբեր ոլորտներում իրականացվող բարեփոխումների համատեքստում։
Անդրադարձ է կատարվել Հայաստան-սփյուռք գործարար կապերի ընդլայնմանը, սփյուռքում ապատեղեկատվության դեմ պայքարին, Հայաստանում իրականացվող բարեփոխումների վերաբերյալ հանրային իրազեկման գործիքակազմերին, առկա մարտահրավերներին և հնարավոր լուծումներին։
Կարդացեք նաև
Կողմերն անդրադարձել են նաև Հայաստանի ներդրումային միջավայրի, տնտեսության տարբեր ոլորտներում առկա հնարավորությունների և սփյուռքահայ գործարարների ու ներդրողների առավել ակտիվ ներգրավման մեխանիզմներին։ Կողմերը կարևորել են ներդրումների խթանման նպատակով պետական և սփյուռքյան կառույցների միջև համակարգված համագործակցությունը, ինչպես նաև Հայաստանի տնտեսական ներուժի և իրականացվող բարեփոխումների վերաբերյալ նպատակային իրազեկումը։
Գլխավոր հանձնակատարը հյուրերին է ներկայացրել Գրասենյակի կողմից իրականացվող միջոցառումներն ու ծրագրերը՝ ընդգծելով դրանցում սփյուռքյան կառույցների մասնակցության և դրանց վերաբերյալ իրազեկվածության կարևորությունը։
Կողմերը երկուստեք ընդգծել են սփյուռքի տարբեր մասնագիտական խմբերի, ինչպես նաև ՀՀ կառավարության ներկայացուցիչների փոխայցերի, համատեղ ծրագրերի և միջոցառումների իրականացման կարևորությունը՝ պատրաստակամություն հայտնելով առավել սերտացնելու համագործակցությունը։
Սփյուռքի գլխավոր հանձնակատարի գրասենյակ
