«Ժառանգություն» կուսակցության վարչության փոխնախագահ Ռուբեն Հակոբյանի համար պարզ երեւում է՝ քաղաքական դաշտում ով ում հետ է համագործակցում եւ ինչ գնով է այդ համագործակցությունը ձեռք բերվում: «Չեմ ցանկանում շատ մանրամասներ ասել, ժամանակը ցույց կտա: Այն ուժերը, որոնք ուզում են միասնական շտաբ՝ արդար ընտրություններ անցկացնելու համար՝ դրա տակ ապահովելով կոալիցիոն մեկ այլ ուժի անօրինական գործունեությունը, ինչը հետագայում պետք է դառնա նույն կոալիցիայում ուժային կենտրոնի տեղափոխություն, այսինքն Հանրապետական կուսակցության, մենք վստահորեն այդ քայլի մեջ չենք մտնելու … Այս պետության համար ամբողջ կոալիցիան է պատասխանատու, եւ իշխանափոխություն ասելով հասկանում ենք, որ կոալիցիա կոչվածը պետք է իշխանության մեջից դուրս գա ու դիմի ընդդիմությանը»,- մեր զրույցում ասաց Ռ. Հակոբյանը:
Նա նաեւ բացատրեց Րաֆֆի Հովհաննիսյանի քննադատության արժանացած հայտարարությունը, թե «Ժառանգությունը» արդար ընտրությունների անցկացման դեպքում կոալիցիայի կազմի մեջ կմտնի. «Եթե չեն ցանկանում հասկանալ, որ թիվ մեկ խնդիրը արդար ընտրություններն են՝ կարող են այդպես մեկնաբանել, մեզ համար թիվ մեկ խնդիրն արդար ընտրություններ անցկացնելն է, որը, չեմ տեսնում միտում, թե հնարավոր է, որովհետեւ կոալիցիան զբաղված է հակաօրինական գործունեությամբ: Մայիսի 6-ը ընդամենը արձանագրվելու են ընտրությունները, մինչեւ այդ են կատարվում հիմնական կեղծիքները: Րաֆֆի Հովհաննիսյանը նկատի ուներ՝ եթե արդար ընտրություններ եղան, այդ դեպքում կմտածենք կոալիցիա կազմելու մասին»:
Ինչ վերաբերում է «Ժառանգության» հասցեին հնչեցրած քննադատությանը, թե «Օրինաց երկիր» կուսակցության ճանապարհն է բռնել, պարոն Հակոբյանն ասաց, որ ամեն անհեթեթությանը չի պատրաստվում մեկնաբանել. «Բոլոր նրանք, որոնք օրվա կեսը մի ոտքով ընդդիմություն են խաղում, մյուս կեսը՝ թամադայություն են անում իշխանական սեղանին, նրանց պետք է յուրացնել տարածքը: Նրանց ձեռք չի տալիս, որ լինի մի ուժ, որը երեք նախագահի գրած սցենարից դուրս է: Կարծում եմ, մեր քաղաքացին լավ հասկանում է՝ ինչ է կատարվում, ժամանակը կարճ է, բայց դա էլ բավարար կլինի, որ հասկանանք ով ինչ հետագիծ ունի»:VOICE003
Արփինե ՍԻՄՈՆՅԱՆ
