«Ամեն ինչ մի ներկայացրեք ընենց, ոնց որ դուք եք ուզում: Ձեւակերպեք ընենց, ոնց որ կա»,- այսօր ՀՀԿ խորհրդի նիստից առաջ լրագրողներին խորհուրդ տվեց ՀՀԿ-ական պատգամավոր Աշոտ Աղաբաբյանը`պատասխանելով հարցին Հայաստանը կործանվո՞ւմ է: Աշոտ Աղաբաբյանը, ով խորհրդի նիստին եկել էր թեթեւ գինովցած, փաստորեն, սրբորեն հետեւում է նախագահի կողմից առաջ տարվող թեզին, որ ամեն ինչի մեղավորը լրագրողներն են:
Նա կարծում է, որ եթե լրագրողները ամեն ինչ ներկայացնեն «ընենց, ոնց որ կա» Հայաստանը «այսենց երկիր կըլնի»`մատի ժեստով դրական նշան ցույց տվեց նա: Իր ձեւակերպմամբ, Հայաստանը հիմա շատ լավ երկիր է. «Մեռնեմ Հայաստանի ջանին»:
Լրագրողներից մեկի հարցին`Հայաստանը Ռոբերտ Քոչարյանի ժամանա՞կ էր լավ, թե՞ հիմա, Աշոտ Աղաբաբյանը երկար լռեց, հետո ասաց. «Ընդհանրապես Հայաստանը էսօր ընենց չի, որ պտի լիներ: Ո՛չ Քոչարյանի, ոչ էլ էսօր»: Aravot.am–ի հարցին`ինչո՞ւ է այդպես, ովքե՞ր են մեղավորները եւ ինչու պատասխանատվության չեն ենթարկվում, պատգամավորն ասաց. «Մեղավորը ես եմ, որ չեմ կարողանում ասեմ, որ հերիք ա, էլի…»: Թե ի՞նչն է «հերիք» եւ ո՞ւմ դա չի կարողանում ասել Աշոտ Աղաբաբյանը, այդպես էլ պարզ չդարձավ:
Նելլի ԳՐԻԳՈՐՅԱՆ
