Ռուսաստանի Դաշնության նախագահ Վլադիմիր Պուտինը երեկ հանդես է եկել ամենամյա մեծ մամուլի ասուլիսով: Հայաստանյան հասարակության համար այդ ասուլիսում բովանդակային առումով հետաքրքրություն ներկայացնող թեման ներկայումս ռուս-թուրքական լարվածությունն է, որն, այսպես ասած, ամենամոտն է Հայաստանի «մաշկին»: Այդ տեսանկյունից երեկ գրեթե ամբողջ աշխարհում պտտվեց Պուտինի հերթական աղմկոտ հայտարարությունը այն մասին, որ ինչ-որ մեկը Թուրքիայում միգուցե ցանկացել է «լիզել ամերիկացիների համապատասխան տեղը», բայց ճիշտ չի արել:
Ընդհանուր առմամբ և՛ այս հայտարարությունը, և՛ Պուտինի ամբողջ ասուլիսն ընդհանրապես, ըստ էության, զգալիորեն դրսևորել են ՌԴ նախագահի բավականին լարված հոգեվիճակը: Մեծ մարաթոնյան ասուլիսներում Պուտինը սովորաբար փորձում է ներկայանալ բավական ինքնավստահ, իրազեկ, իրավիճակին տիրապետող մարդու տեսքով: Մինչդեռ այս անգամ նա ներկայացել է մի մարդու տեսքով, որն ինքն իրեն նույնիսկ դժվար է տիրապետում, էլ ինչպես կարող է տիրապետել իրավիճակին: Մյուս կողմից՝ այստեղ, իհարկե, ամեն ինչ առավել քան պարզ է: Նավթի գների անկման նոր ալիքը էլ ավելի ծանր խնդիրներ է բերել ՌԴ տնտեսության համար: Միաժամանակ Պուտինը մտել է տնտեսության համար ահռելի ծանրություն հանդիսացող ռազմական մրցավազքի մեջ:
Աշխարհաքաղաքականությունը ծանր բեռ է տնտեսության համար, իսկ Պուտինը թուլացող տնտեսության պարագայում մեծացնում է աշխարհաքաղաքական խնդիրների ծանրությունը: Արդյունքում ստացվում է իսկապես բարդագույն իրավիճակ, և Պուտինի հոգեվիճակը, իհարկե, դրա արտացոլումն է: Ռուս-թուրքական խնդիրները, ըստ էության, պարզապես արագացրել են այս գործընթացները և ստեղծել մի իրավիճակ, որ ըստ էության դարձել է անշրջելի: Եվ սա, իհարկե, կարող է լինել վերջին կաթիլը ՌԴ նախագահի համար: Նա գիտակցում է, որ նահանջի ճանապարհ այլևս չունի, կամուրջներն այրվում են լիովին, իսկ առաջ գնալու համար էլ պարզապես ուժ չունի: Ընդհանուր առմամբ այս դրսևորումն էր Պուտինի մարաթոնյան մեծ ասուլիսը, ինչն, իհարկե, ինքնին երկակի զգացումներ և տպավորություններ է թողնում հայաստանյան դիտահարթակից նայելիս:
Կարդացեք նաև
Մուսա Միքայելյան
Հոդվածն ամբողջությամբ կարող եք կարդալ «Ժամանակ» թերթի այսօրվա համարում
