Տաջիկստանում տեղի ունեցած սահմանադրական բարեփոխումների և լրացումների հանրաքվեից հետո 1994թ. այդ երկրի նախագահի պաշտոնը ստանձնած Էմոմալի Ռահմոնն իրավունք է ստացել ցմահ ղեկավարել երկիրը։ Այդ մասին տեղեկացնում է ռուսական «ՏԱՍՍ» լրատվական գործակալությունը։
Տաջիկստանի Ընտրությունների և հանրաքվեների կենտրոնական կոմիտեի հրապարակած տվյալների համաձայն՝ սահմանադրական հանրաքվեին մասնակցել է 4 միլիոն 402 հազար ընտրող, որոնցից 3 միլիոն 814 հազարը, կամ ընտրողների 94,5%-ը դրական վերաբերմունք է հայտնել սահմանադրական բարեփոխումներին և լրացումներին։
Հանրաքվեի արդյունքում պարզ է դարձել, որ երկրի բնակչության ճնշող մեծամասնությունը կողմ է, որպեսզի երկրի գործող նախագահ, «Խաղաղության և ազգային միասնության հիմնադիր, ժողովրդի առաջնորդ» (Տաջիկստանի խորհրդարանը այս տիտղոսները Ռահմոնին էր շնորհել 2015թ. դեկտեմբերին,-խմբ.) Էմոմալի Ռահմոնը ցմահ կառավարի երկիրը։
Տեղեկացնենք նաև, որ Տաջիկստանի Սահմանադրությունն ընդունվել է 1994թ., որից հետո, երկու անգամ՝ 1999թ. և 2003թ. փոփոխվել և լրացվել է։
