«Մենք պայմանագրից չենք շեղվել: Ուզում եմ հրապարակավ հայտարարել, համաձայնագիրն ամբողջովին արտացոլել ենք այս նախագծում: Կամ դուք չեք կարդում ու ստորագրում եք, կամ կարդում եք, ուղղակի այստեղ այլ քաղաքական խաղ եք խաղում, որը սազական չէ»,- ԱԺ-ում Ընտրական օրենսգրքում փոփոխությունների նախագծի քննարկման ժամանակ իր ամփոփիչ ելույթում ասաց կառավարության աշխատակազմի ղեկավար-նախարար Դավիթ Հարությունյանը:
Նա ընթերցեց իրենց հայտարարության համապատասխան հատվածները, որտեղ առկա են 5 խմբակցությունների ստորագրությունները, իսկ երբ դահլիճից հակադարձեցին, նա նկատողություն արեց. «Կարծում եմ, հանրությունն ավելի լավ է ընկալում, քան ոմանք այս դահլիճում: Խնդրում եմ ինձ չխանգարել»:
Նա ասաց, որ միգուցե ոմանք որոշել են հետ կանգնել համաձայնագրից. «Նորմալ է, բայց այդ դեպքում պետք է նշեմ՝ ցանկացած համաձայնագրում յուրաքանչյուր դրույթ բալանսավորված է մեկ այլ դրույթով»:
Պատգամավորները հիմնականում դժգոհում էին ուրիշի փոխարեն քվեարկելու մասին կեղծ հայտարարություն տվողի համար քրեական պատիժ սահմանելուց եւ ազատազրկելու պատժատեսակից: Դավիթ Հարությունյանն ասաց, որ եթե ինչ-որ անձ քվեարկել է ու հետո թաքնվել է, գնացել է ասենք, զոքանչի տուն , եթե չկարողանան 48 ժամվա ընթացքում նրան գտնել՝ բողոքը կհամարվի ճիշտ, այսինքն, այդքան կշիռ են տալիս դիմումատուին: Բայց դա չի նշանակում, որ կարելի է ի չարս օգտագործել հայտարարություն անելու հնարավորությունը:
Կարդացեք նաև
Նա անդրադարձավ այն օրինակին, որ հարեւանը, իմանալով որ իր հարեւանը հանրապետությունում չէ, քվեարկելիս տեսնում է, որ նրա փոխարեն ինչ-որ մեկը ստորագրել է, քվեարկել է, չպիտի՞ հայտարարի այդ մասին: Դավիթ Հարությունյանն ասաց, որ դա շատ անպատասխանատու մոտեցում է, ի վերջո հարեւան էլ կա, հարեւան էլ: Օրինակ, իր հարեւանները Դավիթ Հարությունյանին չեն տեսնում ու չեն կարող համոզված նման բան պնդել:
«Ուզում եք հե՞տ կանգնել ձեր ստորագրած փաստաթղթից, ցավալի է, բայց պատրաստ եմ ձեզ հետ դա քննարկել՝ մի պայմանով: Այն ամենը, ինչ բալանսավորում էր այս դրույթը, եւս պետք է վերացվի: Խոսքը 3 դրույթի էր վերաբերում, կարող ենք 3-ն էլ հանել: Որոշվել էր, որ քրեական պատասխանատվություն պետք է լինի սուտ հայտարարության, կեղծ դիմումի, թե կրկնաքվեարկության համար: Պետք է վերացվի հավաստիության կանխավարկածը նաեւ: Եթե փոխում ենք, պետք է փոխենք համակարգային: Հակառակ դեպքում չի լինի: Գնդակը ձեր դաշտում է»:
Հռիփսիմե ՋԵԲԵՋՅԱՆ
