«Այն ճյուղերը, որոնք մեր երկրում մենաշնորհված են, բոլոր զարգացած երկրներում հավաքագրում են բյուջե` մոտ 80 տոկոս: Դրա մեջ են վառելիքը, սպիրտը, խմիչքը, ծխախոտը, հացահատիկը: Դուք ինչի՞ չեք կանչում էս մենաշնորհի տերերին եւ բացատրում, որ ձեր շահույթն այս տարի պետք է նվազի, եւ դուք բյուջե պետք է վճարեք ավելի շատ գումար: Ոչ թե իրենք ունենան հարյուր միլիոնների շահույթներ… Եթե չեն համաձայնվում այդ խաղի կանոններին, վերացրեք այդ մենաշնորհները»,- խորհրդարանում շարունակվող 2018 թվականի բյուջեի նախագծի քննարկումների ժամանակ հարցրեց «Ծառուկյան» խմբակցության պատգամավոր Սերգեյ Բագրատյանը:
«Ձեր հարցի մեջ այդ՝ «ինչո՞ւ չեք կանչումը» օրենսդրությունից է բխում, չէ՞: Ի՞նչ կանչելու մասին է խոսքը, օրենսդրորե՞ն, թե ոչ օրենսդրորեն»,- հարցին հարցով պատասխանեց գլխավոր գանձապետ Ատոմ Ջանջուղազյանը: «Ինչպես տվել եք մենաշնորհը, այնպես էլ կանչեք»,- արձագանքեց Սերգեյ Բագրատյանը:
Ատոմ Ջանջուղազյանը նկատեց, որ օրենսդրության տեսակետից որևեւէ անհամապատասխանություն չկա, ուստի, կանչելու «ինֆորմացիոն առիթն էլ» չկա: Սերգեյ Բագրատյանի հարց-դիտարկմանը`այսինքն, թղթերով ամեն ինչ նորմա՞լ է, Ատոմ Ջանջուղազյանը պատասխանեց. «Եթե ոչ, ապա դա այլ հարթության թեմա է: Դուք իրավացի եք»:
Նելլի ԳՐԻԳՈՐՅԱՆ