«Լույսին» ԺՈՒԿ-ի վրա են «փռել», «Լույսի» վրա էլ՝ Ռեֆորմիստներին:
Արշակունյաց փողոցում նախընտրական պաստառների համար նախատեսված ցուցատախտակի վրա թեեւ ազատ տեղ կար, սակայն որոշ պաստառներ մեկը մյուսի վրա էին փակցրել: Ի դեպ, վերջերս էլ «Իմ քայլը» դաշինքի թեկնածուին՝ Հայկ Մարությանին, «փռել էին» «Լույս» դաշինքի թեկնածու Արտակ Զեյնալյանի վրա, ու ճիշտ հակառակը՝ Զեյնալյանին՝ Մարությանի վրա: Այս թեկնածուները շատ արագ արձագանքեցին՝ միմյանցից ներողություն խնդրեցին:
«Կոչ եմ անում իմ համակիրներին, եթե անգամ նման բան տեսնեն, նույն կերպ չվարվել, չպատասխանել նույն կերպ, դադարեցնել նման պայքարի ձեւը»,- ասել էր Զեյնալյանը:
Այս փոխադարձ ներողություններից հետո էլ իրավիճակը չի փոխվել: «Լույսի» համակիրները շարունակում են յուրովի ծառայություն մատուցել՝ լավություն անել իրենց թեկնածուին. ամբողջությամբ ծածկել են «Ժողովրդավարական ուղի» կուսակցության թեկնածուի՝ Մանուել Գասպարյանի լայն ժպիտն ու պաստառը:
Ռեֆորմիստների քաղաքապետի թեկնածու Արտակ Ավետյանն էլ «Լույսի» թեկնածուների մի մասին է «ծածկել»:
Նման արարքը թեեւ օրենքով թույլատրելի չէ, սակայն Զեյնալյանն այդ առնչությամբ ասել էր. «Չեմ կարծում, որ այստեղ հնարավոր է հասնել վարչական պատասխանատվության, գործնականորեն անհնար է բացահայտել ու իրականացնել վարչական վարույթ, պատասխանատվություն»։ Ու այսպես պաստառ փակցնողները, հավանաբար՝ անգիտակցաբար, ոգեւորվեցին ու «թեւեր առան»՝ իրենց թեկնածուին ում վրա ուզում՝ «փռում են»:
Լուսանկարները՝ ՆԵԼԼԻ ԲԱԲԱՅԱՆԻ
«Առավոտ»
18.09.2018
«ԵՐԵՎԱՆ ԼՈւՅՍԻ ՔԱՂԱՔ»:
Երբ մի ամբողջ երկրի պաշտօնական ուղղագրութիւնը բոլշեւիկեան խեղագրութիւնն է …
17 տառից 16-ը մեծատառ է գրուած, իսկ մէկը (Ււ)՝ փոքրատառ: Փաստօրէն Արտակ Զեյնալեանի դաշինքում հայերէն իմացող չկայ:
Յ.Գ. Ֆրանսերէն բառ եմ գրում՝ gouvernementalisation: Հիմա պատկերացրէք սա մեծատառերով գրուած՝ GOuVERNEMENTALISATION. Նկատեցիք չէ՞, որ մի բան այն չէ: