Երեւանի քաղաքապետարանում այսօր հրավիրված ասուլիսում նորընտիր քաղաքապետ Տիգրան Ավինյանին հարց ուղղվեց՝ ունեք 32 մանդատ՝ «Հանրապետություն» խմբակցության հետ միասին, ավագանու որոշումներ կայացնելու համար հարկավոր է 33 մանդատ, օրինակ` բյուջեի քվեարկության համար հարկավոր է ձայների 2/3-ը, այս խնդիրն ինչպե՞ս եք լուծելու, եւ բացի այս, մտավախություն չունե՞ք, որ մեկ տարի հետո կարող են ձեզ իմպիչմենտի ենթարկել, մանավանդ որ նման խոսակցություններ կան։
Ի պատասխան հարցի՝ Ավինյանն ասաց․ «Իմպիչմենտի մասով՝ խնդրեմ, ես որեւէ խնդիր չունեմ։ Չեմ պատկերացնում, որ որեւէ խնդիր կարող ենք ունենալ արտահերթ ընտրությունների գնալու առումով, իհարկե ոչ այս տուրբուլենտ ժամանակաշրջանում։ Բայց եթե նման ցանկությունը մյուս ուժերը հաստատակամ ունենան՝ խնդրեմ, կքննարկենք»։
Անդրադառնալով բավարար ձայներ ունենալու մասին հարցին, քաղաքապետն ասաց՝ նմանատիպ դրույթներ չկան Երեւանի ավագանու ընթացակարգում․ «Մենք բոլոր խմբակցությունների հետ աշխատելու ենք։ Գրեթե բոլոր ուժերի ծրագրերը շատ նման են իրար, նույնական շատ դրույթներ կան, եւ դրանք, վստահ եմ, մյուս ուժերն էլ պետք է ցանկանան, որ իրականացվեն։ Կարծում եմ՝ այդտեղ խնդիրը լինելու է ոչ թե թշնամանքը կամ վնասարարությունը, այլ հուսով եմ, այնուամենայնիվ, կառուցողական միջավայրում ենք անցկացնելու նիստերը, որոշումները կայացվելու են հանուն Երեւանի, երեւանցիների»։
«Հանրապետություն» խմբակցության ղեկավար Արտակ Զեյնալյանն էլ հավելեց․ «Պատկերացրեք՝ եթե մենք ավագանու նոր ընտրություններ կազմակերպեինք, որքան լրացուցիչ միջոցներ էին ծախսվելու, եւ միայն պետական բյուջեի միջոցների մասին չէ խոսքը, ազգային կապիտալի մասին է խոսքը։ Այդ միջոցները կարող են ուղղվել արցախահայության իրավունքների պաշտպանությանը կամ նրանց սոցիալական խնդիրների լուծմանը։ Մենք դա արել ենք վնասարարություն չանելու համար»։
Կարդացեք նաև
Նելլի ԲԱԲԱՅԱՆ