«Այն հայտարարությունները, որ 622 հազար դոլարի դիմաց Անդրանիկ Թևանյանը պետական գաղտնիք է հայտնել ինչ-որ երկրի և դրանով լրտեսություն իրականացրել, մեղադրանքից հանված է 622 հազար դոլարը։ Երբ փաստաբանները հարցնում են՝ ո՞ր երկրի լրտեսն է Անդրանիկ Թևանյանը, մեղադրողները երկրի անունը չեն կարողանում տալ։ Մի մեղադրանք, որտեղ չկա՝ ում համար է այդ ամենն արվել, ում է տրվել այդ պետական գաղտնիքը։ Չկա գումարը, չկա պետական գաղտնիքը, մեղադրանքը փլուզված է»-անդրադառնալով Անդրանիկ Թևանյանի և Արեգնազ Մանուկյանի գործին՝ ՀՀ կառավարության շենքի դիմաց հայտարարեց «Մայր Հայաստան» կուսակցության անդամ Ստեփան Դանիելյանը։
Տեղեկացրել ենք՝ ՀՀ գլխավոր դատախազության առաջ ընդդեմ քաղաքական բռնաճնշումների բողոքի ցույցի ժամանակ քաղաքացիները պահանջում էին՝ «Ազատություն բոլոր քաղբանտարկյալներին», «Ամո′թ բոլոր պատվեր կատարողներին»։ Այնուհետև նրանք շարժվեցին դեպի ՀՀ կառավարության շենք և բողոքի ցույցը շարունակեցին այնտեղ։
«Մայր Հայաստան» կուսակցության վարչության անդամ Ստեփան Դանիելյանն այստեղ հնչեցված իր ելույթում հայտարարեց․ «Արեգնազ Մանուկյանի դեմ որևէ մեղադրանք գոյություն չունի։ Իրեն ձերբակալել են ենթադրությունների հիման վրա, որ ինչ-որ մի բան հնարավոր է՝ հանձնել է Անդրանիկ Թևանյանին։ Մի կասկածի վրա մարդուն ձերբակալում են՝ հաշվի առնելով կին է, երեխա, ծեր մայր ունի, որ ահաբեկելով համոզեն՝ ինչ-որ բան ասի։ Բայց նա ոչ մի բան չի հնարել այդ ահաբեկման հետևանքով։ Այս գործը մաքուր աշխարհաքաղաքական, քաղաքական հետապնդում է»։
Կարդացեք նաև
Բողոքի ցույցն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
