Լեռնային Ղարաբաղի Հանրապետությունում մայիսի 3-ին ժամը 8-ից սկսվել են խորհրդարանական ընտրությունները: Գերմանիայի Բունդեսթագի պատգամավոր Ալբերտ Վայները լրագրողների հետ զրույցի ընթացքում ասաց, որ շատ լավ է, որ Լեռնային Ղարաբաղում ժողովրդավարական ընտրություններ են անցկացվում, սակայն նա նկատեց, որ ընտրություններից կախված չէ ԼՂՀ միջազգային ճանաչումը:
«Լեռնային Ղարաբաղը միայնակ ճանաչման չի կարող հասնել, պետք է բազմաթիվ բանակցություններ կատարվեն այլ երկրների հետ, նամանավանդ, հարեւան երկրների: Իհարկե, դժվար է, բայց անհրաժեշտ է»,- ասաց նա:
Ալբերտ Վայները հայտնեց, որ մայիսի 20-ից Գերմանիայում կազմավորվելու է հայ-գերմանական ֆորում, որի ընթացքում քննարկվելու են նաեւ Լեռնային Ղարաբաղի հարցը եւ խորհրդարանական ընտրությունները:
Անդրադառնալով Բունդեսթագում տեղի ունեցած քննարկումներին Հայոց ցեղասպանության մասին` նա ասաց. «Ես նույնպես այդ ֆորումի շրջանակներում ելույթ ունեցա եւ հայտարարեցի, որ տեղի ունեցած դեպքերը ցեղասպանություն են: Իմ շատ գործընկերներ համարում են, որ տեղի է ունեցել ցեղասպանություն, եւ մենք քայլեր ենք ձեռնարկել, որպեսզի այդ ցեղասպանություն բառը իր տեղը գտնի»:
Կարդացեք նաև
Հարցին, թե երբ կշարունակվեն քննարկումները, նա նշեց, որ հստակ ժամանակ չի կարող ասել. «Դա երկար չի տեւի, ամեն դեպքում` մենք քննարկելու ենք առանձին խմբերում, այնուհետեւ` դա տեղափոխվելու է խորհրդարան»:
Ամի ՉԻՉԱԿՅԱՆ
