«Կարծում եմ՝ սթափ վերլուծության ժամանակը դեռ կգա, այսօր դեռ կրքերը բորբոքված են»,- օգոստոսի 2-ին «Անդրադարձ» մամուլի ակումբում լրագրողների հետ հանդիպման ընթացքում ասաց Հ. Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանը:
Նա նշեց, որ առօրյա կյանքը եւ կատարվածը ապացուցեց մի բան, որ ամեն ինչը ուսումնասիրել է պետք. «Նույնիսկ եթե հեղափոխություն ես անում, պետք է հեղափոխական լինես, պատրաստվես, թե ինչպես են հեղափոխություն անում: Մենք հաճախակի հայրենասիրությունը դարձնում ենք մի դրոշ, որը արդարացնում է բոլոր տեսակի տաղանդների բացակայությունը: Մեզ մոտ բոլորը սիրում են հայրենասիրությունը: Դուք կգերադասե՞ք գնալ մասնագետ վիրաբույժի մոտ, թե՞ հայրենասեր վիրաբույժի մոտ: Ես կարծում եմ՝ բոլոր պարագաներում կրթական համակարգը, գիտական համակարգը գցել ենք մի կողմ, ասում ենք՝ առաջնորդվեք սրանով, սրանք հայրենասերներ են, շատ բարի, բայց հայրենասիրությունը մասնագիտություն մի՛ դարձրեք: Եթե ես դերասաններին ասեմ՝ դուրս եկե՛ք բեմ եւ կատարեք ձեր հայրենասիրական պարտքը, եւ ի՞նչ կստացվի, հայրենասիրությո՞ւն»:
Ռուբեն Բաբայանը նկատեց, որ պատգամավորներից ընդամենը 1-2-ը վերջին 10-15 տարիների ընթացքում ինչ-որ զարգացում են ունեցել. «Հիմնականում մենք տեսնում ենք, որ նույն մակարդակի վրա են, ինչ 10 տարի առաջ: Ընդ որում, կապ չունի՝ ընդդիմությունից են, թե իշխանությունից են. այդ մարդիկ չեն զարգանում: Հնարավոր չէ այդպիսի կյանքով ապրել»:
Կարդացեք նաև
Ամի ՉԻՉԱԿՅԱՆ
