Ազգային ժողովն այսօր քննարկեց «Իմ քայլի» պատգամավորներ Լիլիթ Մակունցի եւ Սիսակ Գաբրիելյանի հեղինակած՝ «Հարկային օրենսգրքում» փոփոխությունների օրինագիծը երկրորդ ընթերցմամբ եւ ամբողջությամբ ընդունելու հարցը: Այս օրինագիծը վերաբերում է աշխատող ուսանողների վարձը եկամտահարկով փոխհատուցելուն:
«Մենք սկզբում առաջարկել էինք, որ սա բոլոր ուսանողների վրա տարածվի, բայց որոշեցինք, որ եկամտահարկի վերադարձը կտարածվի միայն մագիստրատուրայի ուսանողների վրա: Հետագայում կարող ենք քննարկել բոլոր ուսանողներին վերաբերելու հարցը»,-նշեց Սիսակ Գաբրիելյանը:
Նա ասաց, որ փոփոխություն են արել, եւ, ըստ այդմ, օրենքը կվերաբերի միայն ՀՀ քաղաքացի հանդիսացող ուսանողներին: Պատգամավորը նաեւ հայտնեց, որ եկամտահարկի վերադարձը տեղի կունենա այս տարվա սեպտեմբերի մեկից՝ անկախ նրանից, որ կառավարությունն առաջիկա երկու ամսում պետք է սահմանի օրենքի շրջանակում տեղավորվող մասնագիտությունների ցանկը. «Այդ մասնագիտությունների մագիստրատուրայի երկրորդ կուրսի ուսանողները, այսինքն՝ նախորդ տարի ընդունվածները եւս կկարողանան օգտվել այս օրենքից»: Օրինագիծն ընդունվեց 102 «կողմ» ձայներով:
Լուիզա ՍՈՒՔԻԱՍՅԱՆ
