ՀՀ կրթության‚ գիտության‚ մշակույթի և սպորտի նախարարության «Կրթական ծրագրերի կենտրոն» ԾԻԳ-ի կողմից համակարգվող Նորարարությունների մրցակցային հիմնադրամի ֆինանսավորմամբ իրականացվող «ՇԻՆ-ԼԱԲ» ծրագրի շրջանակներում Ճարտարապետության և շինարարության Հայաստանի ազգային համալսարանում հիմնվել է «Տրանսպորտային ուղիների շինարարություն և շահագործում» կրթական ծրագրին միտված ուսումնագիտափորձարարական ժամանակակից լաբորատորիա‚ որտեղ հետազոտություններ կիրականացնեն և իրենց գիտելիքները կկատարելագործեն ճանապարհաշինության ոլորտում մասնագիտացող ուսանողները։
«ՇԻՆ-ԼԱԲ» ծրագրի ղեկավար Վարազդատ Հովհաննիսյանը նշեց, որ թեև բուհը պարբերաբար թարմացնում է իր լաբորատոր բազան‚ սակայն տրանսպորտային ուղիների շինարարությանն ու շահագործմանն ուղղված բազմաֆունկցիոնալ նման լաբորատորիա բացվում է առաջին անգամ։ Պարոն Հովհաննիսյանը նկատեց‚ որ այս նախագծի նպատակը «Տրանսպորտային ուղիների շինարարություն և շահագործում» կրթական ծրագրի դասավանդման և ուսումնառության արդյունավետության բարձրացումն է, ինչպես նաև բուհի կարողությունների հզորացումը։ Ծրագրի արժեքը մոտ 350 հազար դոլար է։ Նորագույն փորձասարքերը թույլ են տալիս կրթության գործընթացը կազմակերպել՝ առավել կարևորելով պրակտիկ‚ հետազոտական կողմը։
Ճարտարապետության և շինարարության Հայաստանի ազգային համալսարանի «Ճանապարհներ և կամուրջներ» ամբիոնի վարիչ Հակոբ Գյուլզադյանը‚ խոսելով լաբորատորիայի մասին‚ նշում է‚ որ այն հագեցվել է գերժամանակակից, որակյալ, հիմնականում իտալական արտադրության սարքավորումներով։ Դրանց թվում են‚ օրինակ‚ բիտումի փորձարկման սարքավորումները՝ մածուցիկության չափման վիսկոզիմետր‚ փափկեցման կետի որոշման գունդ և օղակ սարք, պենետրոմետր, ասֆալտբետոնային խառնուրդների նախագծման Մարշալի թեստի ամբողջ ցիկլի սարքավորումներ, գրունտների առաձգականության մոդուլի և խտության որոշման սարքավորումներ, ջերմաչափեր‚ մուֆելային վառարան‚ վիբրոմաղեր և այլն։
Կարդացեք նաև
Պարոն Գյուլզադյանը նշում է‚ որ լաբորատորիայի փորձերի գործընթացին կներգրավվեն եւ բակալավրիատի‚ եւ մագիստրատուրայի ուսանողները։ Նա նաև տեղեկացնում է‚ որ պետք է որոշակի փոփոխություններ կատարվեն ուսումնական ծրագրերում՝ համապատասխանեցնելով դրանք լաբորատորիային։ Ըստ պարոն Գյուլզադյանի՝ լաբորատորիայի աշխատանքներին երիտասարդ, որակյալ կադրերի ներգրավումն ամբիոնի գործունեության համար սահմանված առաջնահերթություններից է‚ և այդ ուղղությամբ արդեն իսկ աշխատանքներ տարվում են։
Ամբիոնի վարիչը նկատեց որ ճանապարհաշինության որակը մեծապես պայմանավորված է նաև լաբորատոր փորձաքննությունների որակով‚ ուստի խիստ կարևորում է նման լաբորատորիաների‚ փորձաքննող մասնագետների աշխատանքն ու ճիշտ կառավարումը։
Լիլիթ ՄԱՆՈՒԿՅԱՆ
