Քաղաքական գործիչ Դավիթ Շահնազարյանը գրեթե համոզված է, որ այսօր ԱՄՆ նախագահ Ջո Բայդենն իր ուղերձում կարտասանի «ցեղասպանություն» բառը:
Այսօր Ծիծեռնակաբերդի հուշահամալիրում Դավիթ Շահնազարյանն ասաց. «Բայց եկեք հստակ հասկանանք, որ դա կապված է լինելու աշխարհաքաղաքական գործոնների հետ, Միացյալ Նահանգների շահերի եւ Թուրքիայի այսօրվա քաղաքականության հետ: Բայց, ինչեւէ, դրանից հետո Հայաստանի արտաքին քաղաքականության համար նոր հնարավորություններ են բացվում, ինչը այս իշխանություններն անընդունակ են իրականացնելու՝ ինչպես նաեւ ընդհանրապես արտաքին քաղաքականություն վարելու»:
Նրա խոսքով, այսօր Թուրքիան վարում է «նեղ օսմանիզմի քաղաքականությունը», որի զոհերը թե՛ մարդկային թե քաղաքական առումով մենք էինք. «Ու միայն այն պատճառով, որ Հայաստանում արդեն 3 տարի ունենք իշխանություն, որը պաշտպանում է նույն նեոօսմանիզմի քաղաքականության շահերը: 1915-ից հետո մեր ամենամեծ աղետը 2020 թվականն էր եւ առաջին հերթին մեզ պետք է միասնություն, որպեսզի հաղթահարենք մեր ներսի նեոօսմանիզմը: Սա է գլխավոր նպատակը: Այն 5 հազարից ավելի զոհերը, հայրենիքի կորուստը տեղի չէր ունենա, եթե Հայաստանն ունենար թեկուզ վատ, բայց իր իշխանությունը, ոչ թե օտարի նշանակած իշխանությունը: Հուսանք, որ մոտ ապագայում կկարողանանք ազատվել պետական դավաճանություն կատարած այս իշխանություններից, որպեսզի կարողանանք պահպանել արդեն
Հայաստանի տարածքային ամբողջականությունը եւ մեր պետականությունը: Եթ վտանգը Արցախն էր, հիմա արդեն վտանգը Սյունիքն է: ՀՀ իշխանությունները լծված են հաղորդակցական ինչ-որ միջանցքներով, որոնք չեն բխում Հայաստանի շահերից»:
Կարդացեք նաև
Դավիթ Շահնազարյանի խոսքով, Հայաստանն այսօր գործոն չէ. «Երկու տարի առաջ եմ ասել, որ Հայաստանը միջազգային հարաբերությունների սուբյեկտ չէ, ընդամենը օբյեկտ է: Ոչ մի հարց չի լուծվելու, ամեն ինչ շարունակելու է վատթարանալ, վտանգները մեր տարածքային ամբողջականությանն ուղղված շարունակելու են մեծանալ, քանի դեռ չենք հրաժարվել նեոօսմանիզմի շահերը սպասարկող այս քաղաքականությունից»:
Լուսինե ԲՈՒԴԱՂՅԱՆ
