«Առաջին անգամն է, որ ունենք հնարավորություն դառնալու իրական քաղաքական-տնտեսական տարածաշրջան։ Վերջին 35 տարիներին շատ ենք սպասել այս պահին մասին, որ խոսենք տարածաշրջանային կապերի մասին։ Երկկողմ հարաբերությունները միայն բավարար չեն գրավիչ լինելու աշխարհի համար։ Պետք է Հարավային Կովկասը գրավիչ հանգույց դառնա տարածաշրջանի համար»,- «Երևանյան երկխոսություն» միջազգային երրորդ համաժողովի «Հարավային Կովկասը՝ շրջադարձային փուլում․ խաղաղության և համագործակցության հեռանկարները» թեմայով պանելային քննարկման ժամանակ հայտարարեց Վրաստանի փոխարտգործնախարար Լաշա Դարսալիան։
Ըստ նրա՝ բոլոր արտաքին դերակատարների հետաքրքրությունները չեն, որ այս տարածաշրջանում ունեն թափանցիկություն․ «Այս առումով տարածաշրջանն օգնության կարիք ունի։ Կարևոր է լսել տարածաշրջանի դերակատարներին և օգնել, երբ դրա կարիքն ունենք»։
Թոփչուբաշևի անվան Բաքվի վերլուծական կենտրոնի տնօրեն և համահիմնադիր Ռուսիֆ Հուսեյնովը, խոսելով հայ-ադրբեջանական հաշտեցման գործընթացի մասին, նկատեց՝ ՀՀ-ում ադրբեջանցի փորձագետ տեսնելն արդեն արտասովոր բան չէ․ «Փորձագիտական երկկողմ այցելությունները նպաստում են հասարակությունների հաշտեցմանը։ Որքան առաջ ընթանանք, ավելի կարիք կլինի ինչ-որ իրավական և դիվանագիտական հենքի»։
Կարդացեք նաև
Խոսելով արտաքին դերակատարների մասին հարցերի առիթով՝ Ռուսիֆ Հուսեյնովը նշեց․ «Ադրբեջանում բավականին շատ տրավմայի ենք ենթարկվել տասնամյակներ շարունակ Մինսկի խմբի տխրահռչակ ներգրավվածության պատճառով։ Ադրբեջանի կարծիքով՝ այդ միավորը վնասներ հասցրեց իրավիճակին՝ առանց լուծումներ առաջարկելու։ Հետպատերազմյան այս վերականգնողական փուլում ադրբեջանական կողմը նախընտրում է երկկողմ ներգրավվածությունը ՀՀ-ի հետ։
Օրինակ՝ խաղաղության գործընթացը, սահմանազատումն ու սահմանագծումը երկկողմանի գործընթացներ են։ Բաքուն ողջունում է արտաքին ուժերի ներգրավվածությունը, եթե օգտակար նախաձեռնությամբ են հանդես գալիս Հարավային Կովկասի երեք կողմերի համար»։
Լուսանկարները՝ «Երևանյան երկխոսություն» միջազգային երրորդ համաժողովի ֆեյսբուքյան էջից։
Տաթև ՀԱՐՈՒԹՅՈՒՆՅԱՆ
