«Հայաստանի և Ադրբեջանի միջև խաղաղության գործընթացն իսկապես հզոր գործընթաց է, որտեղ հավանաբար արտաքին օգնություն ցուցաբերվել է, բայց երկու մայրաքաղաքներն իրենք տեր էին այս նախագծին։ Գնահատելի է երկու կողմերի առաջնորդությունը։ Օրակարգը հենց նրանք են սահմանում։ Կարևոր է ավելի խորը և հումանիտար հարցերին անդրադառնալը»,- «Երևանյան երկխոսություն» միջազգային երրորդ համաժողովի «Հարավային Կովկասը՝ շրջադարձային փուլում․ խաղաղության և համագործակցության հեռանկարները» թեմայով պանելային քննարկման ժամանակ այսպիսի կարծիք հայտնեց Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Մագդալենա Գրոնոն։
Նա նշեց, որ իր տպավորությամբ՝ շատ նմանություններ ունեն երկու երկրները։
Անդրադառնալով Սերդար Քըլըչի այն հայտարարությանը, թե հայերն ու թուրքերը շատ նման են, անգամ հարսանիքներն են նման, ասաց․ «Տասնամյակներ շարունակ բաժանում է եղել, թեև գիտենք՝ սնվում, ամուսնանում եք նույն կերպ, ունեք նման երաժշտություն, ավանդույթներ, բայց շատերը հասարակություններում դեռ պետք է հայեցում կատարեն և դեպի ներս կարողանան դա ընդունել»։
Ըստ նրա՝ աննախադեպ առաջընթաց կա հայ-ադրբեջանական հարաբերություններում․ «Կարևոր է կայունության ապահովումը։ Պետք է ամրապնդել կայունություն, փոխկապակցվածություն։ Մեզ համար հաղորդուղիները ապաշրջափակումը կարևոր է։ Մեր հաշվարկներով՝ միջին միջանցքով կանցնեն չորս ուղղություններ, և դա կարող է եռապատկել եկամուտները մինչև 2030 թվականը։ Մեզ համար փոխկապակցվածությունը պետք է լինի ներառական, չմեկուսացնի որևէ գործընկերոջ։ Քննարկում ենք Նախիջևանի երկաթուղու վերականգնումը»։
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարը՝ «Երևանյան երկխոսություն» միջազգային երրորդ համաժողովի ֆեյսբուքյան էջից։
