«Վերջին 22 տարիների ընթացքում ՀՀ իշխանություններն առաջին անգամ շատ լուրջ հայտարարություն են արել, ինչը բխում է հենց ժողովրդի շահերից»:
Այդ մասին Aravot.am-ի հետ հարցազրույցում ասում է Հայաստանի կոմունիստական կուսակցության Վանաձորի քաղաքային կոմիտեի առաջին քարտուղար Անդրանիկ Ղուկասյանը` անդրադառնալով սեպտեմբերի 3-ին ՀՀ նախագահ Սերժ Սարգսյանի` Մոսկվայում արած այն հայտարարությանը, թե Հայաստանը որոշել է մտնել Մաքսային միություն:
«Մենք սա ողջունում ենք, քանի որ մենք առաջնահերթ համարում ենք, որ ժողովրդի անվտանգությունը այս պահին մեզ համար ավելի շատ կարեւոր է: Մենք, ելնելով ժողովրդի անվտանգության շահերից, ամեն ինչ անելու ենք`պաշտպանելու այդ հայտարարությունը, որպեսզի Հայաստանը ընդգրկվի Մաքսային միության կազմում, որից հետո կգա նաեւ Եվրասիական միության մեջ ընդգրկվելու հերթը»,- ասում է ՀԿԿ Վանաձորի քաղաքային կոմիտեի առաջին քարտուղարը:
Նա նկատում է, որ Մաքսային միություն մտնելով` Հայաստանը կլուծի բազմաթիվ հարցեր` աշխատատեղերի ստեղծումից մինչեւ գազի գնի իջեցում:
Կարդացեք նաև
«Եթե մենք լինենք Մաքսային միության անդամ, գազը հաստատ կլիներ այն գնով, որը այսօր տալիս են Բելառուսին: Մաքսային միության մեջ մտնելով` առաջ է գալիս նաեւ վերահսկողության հարցը. երբ մտնում ես միության մեջ, ապա վերահսկողություն կա, այսինքն` այստեղ գումարները աջ ու ձախ չեն ծախսվի: ՄՄ մտնելուց հետո նաեւ աշխատատեղերի խնդիրը կլուծվի: Ես համոզված եմ, որ կաշխատի նաեւ աբխազական երկաթուղին, բացի այդ` ապրանքներն էլ կեժանանան»,-նշում է Անդրանիկ Ղուկասյանը` հավելելով, որ գոյություն ունեցող արտագաղթի եւ ներկա սոցիալ-տնտեսական ծանր պայմաններում խոսել անկախությունն ու ինքնորոշումը կորցնելու մասին, ավելորդ է:
«Գոյություն ունեցող արտագաղթի եւ սոցիալ-տնտեսական ծանր պայմաններում մեր անկախությունն ու ինքնորոշումը արդեն իսկ վտանգված է: Հիմա անկախություն բառով չես սնի: Երբ արտագաղթի արդյունքում Հայաստանում էլ մարդ չմնա, անկախության գաղափարն էլ ինքնըստինքյան կվերանա»,-եզրափակում է ՀԿԿ Վանաձորի քաղաքային կոմիտեի առաջին քարտուղարը:
Անուշ ԲՈՒԼՂԱԴԱՐՅԱՆ
https://www.galatv.am/news/view/razmabaza_102.html?fb_action_ids=527160830697197&fb_action_types=og.likes&fb_source=other_multiline&action_object_map=%7B%22527160830697197%22%3A432374456873021%7D&action_type_map=%7B%22527160830697197%22%3A%22og.likes%22%7D&action_ref_map=%5B%5D