Հայաստանի ՄԱԿ-ի Զարգացման ծրագրի (ՄԱԶԾ), ՄԱԿ-ի փախստականներու հարցերով գերագոյն Յանձնակատարի (ՄԱԿ ՓԳՀ) ներկայացուցչութիւններու եւ Ամերիկայի Հայ Աւետարանչական Ընկերակցութեան (ԱՀԱԸ) միջեւ եռակողմ համագործակցութեան որպէս արդիւնք, վաթսուն համալսարանական շրջանաւարտներ, մեծամասամբ Սուրիայէև եւ Ուգրանիայէն տեղահանուածներ, վճարովի փորձառական աշխատանքի հնարաւորութիւն պիտի ունենան Հայաստանի կարգ մը յատուկ ընկերութիւններուն մէջ:
ՄԱԶԾ-ի «Երիտասարդներու Յառաջխաղացումի Արահետ» (ԵՅԱ) նախաձեռնութիւնը վճարովի փորձարական գործի ծրագիր մըն է, որ նոր շրջանաւարտներուն հնարաւորութիւն կու տայ առաջին անգամ ներգրաւելու իրենց կրթութեան համապատասխանող աշխատանքի եւ ձեռք ձգելու անհրաժեշտ աշխատանքային փորձ ու գործնական գիտելիքներ, որ պիտի նպաստէ ապագային մնայուն աշխատանքի առիթներ ունենալու։ 2007-2014 թուականներուն ՄԱԶԾ Հայաստանեան գրասենեակը իրականացուցած է ԵՅԱ ծրագրի հինգ փուլեր: Ընդհանուր առմամբ, երկու հարիւր քառասուն նորաւարտ երիտասարդներ ԵՅԱ փորձառկական աշխատանքի անցած են Երեւանի եւ Հայաստանի վեց այլ մարզերուն մէջ եւ անոնց շուրջ վաթսուն տոկոսին ծրագրի աւարտին մնայուն աշխատանք առաջարկուած է գործատու կազմակերպութիւններուն եւ ընկերութիւններուն կողմէ։
«Սուրիահայերը աշխատասէր, ստեղծագործ, աշխոյժ եւ արդիւնաւետ են», ըսաւ ԱՀԱԸ-ի Գործադիր Տնօրէն Պրն. Զաւէն Խանճեան։ «Հայաստանի աշխատավայրերը անհրաժեշտւթիւնը ունին նման որակեալ եւ փորձառու աշխատուժի։ Այս ծրագիրը պիտի կարենայ մատուցանել այդ անհրաժեշտութիւնը, եւ ասոր արդիւնքը երկուստէք օգտակար պիտի ըլլայ մեր հայրենիքին: ԱՀԱԸ-ը պիտի շարունակէ համագործակցիլ եւ հովանաւորել նմանատիպ արդիւնաւետ ծրագիրներ»:
Ամերիկայի Հայ Աւետարանչական Ընկերակցութիւնը հիմնադրուած է 1918-ին, որպէս Քրիստոնէական կազմակերպութիւն, իր ծառայութիւնները մատուցանելու բոլոր անոնց որոնք օգնութեան կարիքը ունին՝ առանց խտրութեան։ ԱՀԱԸ-ը իր այս համաշխարհային առաքելութիւնը կ’իրականացնէ պահպանելով շարք մը կրթական, աւետարանչական եւ ընկերային ծառայութիւններ հայրենիքի եւ արտերկրի քսանչորս տարբեր երկիրներու մէջ։
