«Ապրիլի 2-ին, երբ նախագահը հրավիրեց Ազգային անվտանգության խորհրդի նիստ, ձեւավորվել էին բոլոր ներքին եւ արտաքին նախադրյալները` ԼՂՀ անկախությունը ճանաչելու համար»,-կարծում է «Նոր Հայաստան» հանրային փրկության ճակատի քաղաքական խորհրդի անդամ Անդրիաս Ղուկասյանը:
«2010թ.-ին ԵԱՀԿ վեհաժողովում Հայաստանը, ի դեմս Սերժ Սարգսյանի, քաղաքական հայտարարությամբ էր հանդես եկել, որ կճանաչի ԼՂՀ անկախությունը` Ադրբեջանի կողմից ԼՂՀ-ի վրա հարձակման դեպքում: Տեսնում ենք, որ բոլոր նախադրյալները ստեղծվեցին, բայց Հայաստանն իր արած հայտարարությանը հետեւողական չեղավ: Նշանակում է, որ Հայաստանը շարունակելու է քննարկել կարգավիճակն այն կողմի հետ, որը բացահայտ ոտնձգություններ է կատարում եւ խախտում հրադադարը»,-այսօր «Հայացք» մամուլի ակումբում ասաց նա:
Ղուկասյանի բնորոշմամբ` սա պատերազմական դրություն է, ոչ թե պարզապես զինվորական բախում. «Ադրբեջանն այս պահի դրությամբ ավելի բարենպաստ վիճակում հայտնվեց: Հայտարարելով, որ միակողմանի դադարեցնում է ռազմական գործողությունները, նա ընտրություն ստեղծեց հայկական կողմի համար` համակերպվել դիրքային կորուստների հետ, կամ շարունակել ռազմական գործողությունները` դիրքերը հետ վերցնելու նպատակով եւ հակադրվել միջազգային հանրության` կրակը դադարեցնելու պահանջներին: Այսինքն, փորձեց մեղքը իր վրայից փոխանցել Հայաստանին»:
Բանախոսի բնորոշմամբ` Արցախում տեղի ունեցավ եւս մեկ` յուրօրինակ «հանրաքվե». «Աշխարհը տեսավ, որ քաղաքացիներն իրենց կամքը դրսեւորեցին` կամավոր ներկայանալով զինկոմիսարիատներ: Այդ երեւույթը վերացրեց բոլոր անհիմն խոսակցությունները»:
Կարդացեք նաև
Լուիզա ՍՈՒՔԻԱՍՅԱՆ
