2016թ. հունիսի 2-ին Գերմանիայի խորհրդարանում Հայոց ցեղասպանության ճանաչման մասին բանաձևին կողմ քվեարկած ծագումով թուրքերից մեկը՝ այդ երկրի կառավարության փախստականների և միգրացիայի հարցերով պատասխանատու Այդան Օզօղուզը խոսել է նախագծի ընդունման վերաբերյալ։ Այս մասին տեղեկացնում է թուրքական «Յենի շաֆաք» պարբերականը։
Անդրադառնալով Գերմանիայի խորհրդարանում Հայոց ցեղասպանությանը կողմ քվեարկած ծագումով թուրք խորհրդարանականների դիրքորոշմանը՝ Օղօղուզն ասել է. «Մեզանից թող չսպասեն, թե մենք ներկայացնելու ենք Թուրքիան։ Դա արդարացի սպասելիք չէ։ Մենք գերմանացի խորհրդարանականներ ենք, իհարկե, պաշտպանում ենք Գերմանիայում բնակվող ազգությամբ թուրքերի շահերը, որովհետև նրանք այստեղի մարդիկ են, այստեղ են ապրում։ Նրանց իրավունքները պաշտպանելը, նրանց համար քաղաքացիություն պահանջելը շատ բնական է, բայց դա չի նշանակում, որ մենք իրականացնում ենք Թուրքիայի քաղաքականությունը»։
Հիշեցնենք, որ 2016թ. հունիսի 2-ին Բունդեսթագում տեղի ունեցած քվեարկությանը, ի թիվս այլ խորհրդականների, ցեղասպանության ճանաչման բանաձևին կողմ քվեարկեց նաև ծագումով 11 թուրք։
