Ոռոգման ջրի խնդիրը մի շարք մարզերի գյուղատնտեսների կանգնեցրել է լուրջ խնդիրների առաջ: Այսօր այս մասին մտահոգություն հայտնեց Ագրարագյուղացիական միավորման նախագահ Հրաչ Բերբերյանը: «Բլից ինֆո» մամուլի ակումբում պարոն Բերբերյանն ասաց, որ վերջին ամիսների բարձր ջերմաստիճանով պայմանավորված, գրեթե բոլոր մարզերում երաշտ է: Ըստ նրա, այդ առումով ծայրահեղ վիճակում է հատկապես Շիրակի մարզը:
«Հիմա փորձում են ժամանակացույցով ոռոգումը կատարել։ Գյուղացին այս օրերին կրկնակի է ոռոգում, քանի որ ջուրը անմիջապես գոլորշիանում է։ Սա բնականաբար կազդի բերքի վրա»,-ասաց պարոն Բերբերյանը` վստահեցնելով, որ ջրամբարներում ջրի լուրջ խնդիրներ կան:
Պարոն Բերբերյանի խոսքով. «Վերջին 5 տարին մեր ուսումնասիրությունները ցույց են տալիս, որ մենք ունենք ջրամբարների խնդիր։ Չնայած հսկայական գումարներ ծախսվեցին ե’ւ Համաշխարհային բանկի ռեսուրսներից ե’ւ գերմանական վարկից, որպեսզի ջրամբարները լավ աշխատեն, սակայն ոչ մի փոփոխություն չկա»:
Հրաչ Բերբերյանը գտնում է, որ մեծ տնտեսություն ունեցող ֆերմերները կարող են ջուրը ոչ թե ՋՕՄ-երից վերցնել, այլ` միանգամից ՋՐԱՌ-ից գնել. «Գյուղացին, ֆերմերը ցանկանա, թե չցանկանա ՋՕՄ-ի միջոցով պետք է ոռոգում կատարի։ Մենք չենք ասում, որ ՋՕՄ–ը վատ աշխատող կառույց է, բայց պետք է ունենանք այլընտրանքային ոռոգման համակարգ։ Այսինքն`
եթե խոշոր ֆերմեր է, մեծ գյուղ է եւ նա ինքը կարող է ջուր վերցնել, այստեղ ի՞նչ կապ ունի ՋՕՄ–ը: Այժմ գյուղացին մեկ հեկտար կարտոֆիլի ոռոգման համար 16 հազար դրամ է վճարում, բայց իրական արժեքը պետք է լինի 8-11 հազար դրամ»:
Ըստ նրա, կարգով նախատեսված է, որպեսզի գյուղատնտեսը պարտադիր դառնա ՋՕՄ-ի անդամ, պայմանագիր կնքի եւ օգտվի նրանց ծառայությունից, քանի որ ՋՐԱՌ-ը ջուրը միայն վաճառում է ՋՕՄ-երին։
Ինչ վերաբերում է կաթիլային ոռոգմանը, ապա Հրաչ Բերբերյանը գտնում է, որ
կաթիլային համակարգին անցնելը դեռ բարեփոխում չէ, ինչպես փորձում են ներկայացնել կառավարության պաշտոնյաները։ Ըստ նրա՝ բարեփոխումներն այն ժամանակ արդյունավետ կլինեն, երբ ոռոգման համակարգի մենաշնորհն էլ վերացվի:
Լուսինե ԲՈՒԴԱՂՅԱՆ