Քիչ առաջ ոստիկանները բերման են ենթարկել «Տարկետում լինելու ա» խմբի անդամ Դավիթ Պետրոսյանին, որն այլ ուսանողների հետ միասին փորձում էր փողոց փակել: Այս պահին դեռ փակված փողոցներ չկան՝ ոստիկանական խիստ հսկողություն է սահմանված փողոցներում:
Հիշեցնենք, որ ՀՀ ոստիկանությունը հայտարարություն է տարածել. «Հիմք ընդունելով «Հավաքների ազատության մասին» ՀՀ օրենքի 33-րդ հոդվածը, Ոստիկանությունը 16.04.2018թ. որոշում է կայացրել դադարեցնել հավաքը և պահանջել է հավաքի ղեկավարից կատարել այն, այդ մասին անմիջապես տեղեկացնել հավաքի մասնակիցներին: Պարզաբանում ենք, որ օրենքի նշված հոդվածի համաձայն՝ հավաքի ղեկավարի բացակայության կամ հավաքի ղեկավարի կողմից ոստիկանության պահանջը չկատարելու դեպքերում ոստիկանությունը հավաքը ցրելու, ներառյալ` «Ոստիկանության մասին» Հայաստանի Հանրապետության օրենքով նախատեսված հատուկ միջոցներ կիրառելու լիազորությունի ունի»:
Հավաքը դադարեցնելու մասին այս հայտարարությունը ՀՀ փոխոստիկանապետ Վալերի Օսիպյանն այսօր փորձեց հանձնել հավաքի կազմակերպիչ Նիկոլ Փաշինյանին, սակայն նա պատառոտեց այն:
