Այսօր Քաղաքագետների միության նախագահ Հմայակ Հովհաննիսյանն անդրադառնալով իրենց հրավերով Հայաստան եկած Սերգեյ Կուրղինյանի հայտարարությունների շուրջ ծավալված խոսակցություններին, ասաց.
«Ուզում եմ բոլորին զգուշացնել, այն մարդիկ, ովքեր հրահրում են արտագաղթ, ողջունում են այն, ապա, դա դառը իրականություն է, եւ այն հայերը, ովքեր մեկնում են Հայաստանից Ռուսաստան, սպասարկելու են ռուսական պետության շահերը, իսկ Կուրղինյանը Ռուսաստանի քաղաքացի է: Այ դրա համար եկեք այնպիսի երկիր կառուցենք, որ հայահավաք տեղի ունենա, ոչ թե արտագաղթ»:
Հովհաննիսյանն անդրադարձավ նաեւ մամուլում տեղ գտած մեկնաբանություններին, նա դրանք խեղաթյուրված հայտարարություններ համարեց, ասելով, թե հրապարակումները, որտեղ մատնանշվում է, որ Սերգեյ Կուրղինյանին ուղարկել է Կրեմլը` սխալ է: «Նրան հրավիրել է քաղաքագետների միությունը՝ ինչպես որ 15 տարի առաջ: Ռուսաստանը մեր ռազմավարական դաշնակիցն է, եւ եթե գրում են, թե Կուրղինյանին Կրեմլն է ուղարկել, այդ կերպ վիրավորում են մեզ»,- ասաց Հովհաննիսյանը: Նրա խոսքով`իրենք պատրանքներ չունեն, թե Կուրղինյանը Ռուսաստանում ներկայացնելու է Հայաստանի շահերը:
Հովհաննիսյանը հավաստիացրեց, որ Կուրղինյանի գալը շատ կարեւոր էր:
Կարդացեք նաև
Եվա ՀԱԿՈԲՅԱՆ
