«Ես սիրում եմ Հայաստանում ռադիոյի ստեղծումը նույնացնել Անկախության օրվա՝ սեպտեմբերի 21-ի հետ, թեպետ այն ստեղծվել է սեպտեմբերի 1-ին: Մեր ռադիոն իրականության մեջ մի մասով գտնվում է մշակութային ժառանգության անցյալում, մյուս մասով շատ հաստատուն կերպով կանգնած է ներկայում և հայացքն ուղղված է դեպի ապագան»,- ասում է Հայաստանի Հանրային ռադիոյի գործադիր տնօրեն Արմեն Ամիրյանը:
Մայիսի 7-ը Ռադիոյի միջազգային օրն է: 1895 թվականի հենց այդ օրը ռուս ֆիզիկոս Ալեքսանդր Պոպովը հանրությանը ներկայացրեց իր զեկույցն ու իր ստեղծած աշխարհում առաջին ռադիոսարքավորումը՝ իրականացնելով առաջին ռադիոկապը:
«Հայաստանում ռադիոն ստեղծվեց 1926 թվականին, և դրա ստեղծմամբ մեր կյանքում շատ բան փոխվեց»,- այսօր լրագրողների հետ հանդիպման ժամանակ ասաց Ա. Ամիրյանը՝ նկատելով, որ 89-ամյա Հանրային ռադիոն այսօր էլ շարունակում է դիտվել և´ որպես մշակութային, գիտակրթական հաստատություն, և´ որպես լրատվամիջոց. «Հանրային ռադիոն դասական իմաստով մնում է որպես լրատվամիջոց, ուստի՝ շատ կարևոր է նրա հասանելիությունը, և մենք այսօր օգտագործում ենք ժամանակակից բոլոր հնարավոր միջոցները, որպեսզի Հանրային ռադիոն իր ունկնդիրներին, ինչպես նաև ընթերցողներին հասանելի լինի սոցիալական ցանցերի, բջջային հավելումների և ժամանակակից այլ միջոցներով ևս»,- ասաց Ա. Ամիրյանը՝ նշելով, որ այսօր Հանրային ռադիոն հեռարձակվում է 14 լեզուներով, այդ թվում նաև՝ ՀՀ-ում բնակվող ազգային փոքրամասնությունների լեզուներով:
Հարցին՝ արդյոք նոր տեխնոլոգիաների առկայության պայմաններում ռադիոն չի հնացել, Ա. Ամիրյանը պատասխանեց. «Մի՞թե Չարենցի, Թումանյանի կամ Հրաչյա Ներսիսյանի ձայնը հին են: Իսկ տեխնիկական առումով ռադիոն շատ ավելի հասանելի է հանրությանը, քանի որ անգամ մեքենա վարելիս կարող ես միացնել այն ու ծանոթանալ օրվա անցուդարձին»:
Սիրանուշ ՀԱՅՐԱՊԵՏՅԱՆ
